Ukrayna silahlı qüvvətlərinə təlim keçmək məqsədilə 300 amerikalı dəniz piyada desantı bu ölkəyə gəlib. Modern.az saytı xarici KİV-ə istinadən xəbər verir ki, ABŞ hərbçiləri aprelin 17-də Ukraynanın Lvov şəhərinə yerləşiblər.
Ukrayna Terrorla Mübarizə Mərkəzinin sözçüsü Andrey Lısenko bildirib ki, amerikalı desantçılar gələn həftədən etibarən Lvov şəhəri yaxınındakı poliqonda 900 Ukrayna əsgərinə təlim keçəcək. Üç mərhələli təlimin hər mərhələsi 8 həftə davam edəcək. Daha sonra eyni poliqonda Ukrayna-ABŞ əsgərləri ortaq təlim manevri edəcəklər.
Rəsmi Moskva bu olaydan rahatsız olduğunu gizlətməyib. Kremlin sözçüsü Dmitri Peskov deyib ki, bu addım Ukraynadakı vəziyyəti “ciddi şəkildə sabitsizləşdirə bilər”.
O deyib ki, ABŞ-ın bu ölkədəki hərbi mövcudiyyətini münaqişənin çözümünə yönəlmiş addım adlandırmaq olmaz. ABŞ və NATO isə Rusiyanı Ukraynanın şərqindəki separatçıların dəstəklənməsi üçün silah və canlı qüvvə göndərməkdə ittiham edirlər. Rusiya prezidenti Vladimir Putin ötən çümə axşamı günü Qərbin bu iddialarını rədd edib və milyonlarla insan qarşısındakı çıxışında deyib ki, Ukraynada Rusiya hərbçiləri yoxdur.
Ukraynanın şərqindəki qiyamçılarla rəsmi Kiyev ötən fevralda atəşkəs razılığı əldə ediblər, lakin son vaxtlar atəşkəsin pozulması halları artıb.
Modern.az
