Azərbaycanlıların və digər Türkdilli Xalqların Əməkdaşlıq Mərkəzi (ATXƏM) İctimai Birliyinin sədri İlham İsmayılov 60 saylı Salyan-Neftçala seçki dairəsindən müstəqil olaraq öz namizədliyini irəli sürüb.

Bu barədə Modern.az saytına ATXƏM-in mətbuat xidmətindən məlumat verilib.

Qeyd edək ki, bu dairədən namizədliyini irəli sürən Ana Vətən Partiyasının sədri Fəzail Ağamalı da iddialı adaylardandır.

İlham İsmayılov 1960-ci ildə Salyan rayonunun Qaraçala qəsəbəsində anadan olub. 2005-ci ildə Milli Məclisinə keçirilən seçkilərdə də 60 saylı Salyan-Neftçala seçki dairəsindən namizəd olan İlham İsmayılov seçkilərin keçirilməsinə az müddət qalmış namizədliyini geri götürüb. Doğulub, boya-başa çatdığı Salyan rayonunda fəhlə kimi əmək fəaliyyətinə başlayan İlham İsmayılov sonralar Salyan rayonunda emalatxana müdiri və kiçik asossiasiya rəhbəri olub. 1992-94-cü illərdə Salyan rayonu Kənt təsərrüfatı və ərzaq idarəsinin rəisi vəzifəsində çalışıb. 1994-98-ci illərdə Azərbaycan Respublikası Kənd Təsərüfatı Nazirliyində Kənd təsərrüfatı pambıq emalı və satış idarəsinin rəis müavini vəzifəsində çalışan İlham İsmayılov 1998-ci ildən biznes fəaliyyəti ilə məşğul olub, 1998-ci ildən bu günə kimi “Klassik A.İ” şirkətinin direktorudur. Bizneslə məşğul olduğu dövrdən ictimai fəaliyyətə də önəm verən İlham İsmayılov 2007-ci ildə təsis etdiyi Azərbaycanlıların və digər Türkdilli Xalqların Əməkdaşlıq Mərkəzinin sədri seçilibr. İlham İsmayılov həm də bütün Türk Dünyasında yayımlanan “Birlik” jurnalının təsisçisidir.

Modern.az