Tələbə Qəbulu üzrə Dövlət Komissiyası (TQDK) Azərbaycanın ali təhsil müəssisələrinə V ixtisas qrupu üzrə və tam orta təhsil bazasında orta ixtisas təhsili müəssisələrinə sabahdan tələbə qəbulu üçün ərizə qəbuluna başlayır.
Modern.az-ın verdiyi xəbərə görə, TQDK sədri Məleykə Abbaszadə bu gün keçirdiyi mətbuat konfransında bildirib ki, ərizələrin qəbulu mayın 5-dən 18-dək aparılacaq: “I-IV ixtisas qrupları üzrə ərizə verən abituriyentlər V ixtisas qrupuna və ya tam orta təhsil bazasında orta ixtisas təhsili müəssisələrinə ikinci ödəmə kartı almadan elektron ərizə təqdim etməlidirlər.Tam orta təhsil müəssisələrini bu il bitirib V ixtisas qrupu üzrə ali təhsil müəssisələrinə və ya tam orta təhsil bazasında orta ixtisas təhsili müəssisələrinə qəbul olmaq istəyən abituriyentlər müvafiq qəbul imtahanı vermir.
Bu abituriyentlər müsabiqədə buraxılış imtahanındakı nəticələr əsasında iştirak edirlər. “Abituriyentin elektron ərizəsi” forması doldurulduqdan sonra ərizələrin təsdiqi təmin edilməlidir. Ərizələrinin təsdiqini təmin etdikdən sonra mayın 6-dan 19-dək TQDK-da yaradılmış müvafiq Qabiliyyət İmtahanı Komissiyalarına tələb olunan sənədləri və yaradıcılıq fəaliyyətinə dair işləri təqdim etməklə seçmə turda iştirak edirlər.
Qabiliyyət İmtahanı Komissiyasında abituriyentlərin seçdikləri xüsusi qabiliyyət tələb edən ixtisaslara yararlılığı yoxlanılır və müvəffəqiyyətlə keçənlər qeydiyyata alınırlar. Qeydiyyata alınan abituriyentlər TQDK-nın mərkəzləşdirilmiş qaydada keçirilən qəbul imtahanlarında iştirak edirlər.
Qəbul imtahanlarında topladıqları ümumi balları müvafiq müsabiqə şərtlərini ödəyən abituriyentlər müəyyən edilmiş cədvəl üzrə qabiliyyət imtahanlarında iştirak edirlər.
V ixtisas qrupu üzrə ali və tam orta təhsil bazasında orta ixtisas təhsili müəssisələrinə qəbul imtahanında abituriyentlər ana dili (Azərbaycan bölməsinin abituriyentləri Azərbaycan dili, rus bölməsinin abituriyentləri isə rus dili), riyaziyyat və xarici dil fənlərindən test imtahanı verirlər. İmtahanda abituriyentlərə hər fəndən 30 test tapşırığı təqdim olunur. Test tapşırıqlarının cavablandırılmasına ümumilikdə 2 saat 15 dəqiqə vaxt ayrılır”.
Yeganə OQTAYQIZI
