Əsası Ulu öndər Heydər Əliyev tərəfindən qoyulmuş xalqın etibarlı ərzaq təminatı daim dövlətin iqtisadi siyasətinin əsasını təşkil edən bir prosesdir. Dahi rəhbərin təşəbbüsü ilə hələ 20-ci əsrin sonlarında Azərbaycanda torpaq islahatlarının aparılması, kənd təsərrüfatı işçilərinə, fermerlərə yardım mexanimlərinin formalaşdırılması, beynəlxalq təşkilatlarla bu sahədə əhəmiyyətli əlaqələrin qurulması kimi məqsədyönlü işlər aparılmışdı. 2001-ci ildən təsdiqlənmiş “Azərbaycan Respublikasının Ərzaq Təhlükəsizliyi Proqramı” çərçivəsində görülən işlər ölkədə kənd təsərrüfatının dirçəldilməsinə, yerli ərzaq məhsulları istehsalının artırılmasına, daxili və xarici bazarlarda bu məhsulların tələbatına xüsusi yol açdı. Hazırda Azərbaycanda bir çox strateji məhsullara tələbat yerli istehsal vasitəsilə ödənilir, xarici ölkələrə məhsul ixracı gün-gündən artırılır.
Bu iqtisadi siyasət platformasının uğurlu gedişatı Azərbaycan Prezidenti cənab İlham Əliyevin tərəfindən bu gün layiqincə davam etdirilir. Onun müvafiq dövlət qurumlarına göstəriş və tapşırıqları, qəbul edilən sənədlər, qarşıda duran vəzifələrin müəyyənləşdirilməsi planında kənd təsərrüfatı sahəsinə diqqətin artırılması məsələsi öncül yerdə dayanır.
Bu yerdə İlham Əliyevin Nazirlər Kabinetinin 2015-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasındakı yekun nitqinə nəzər salmaq yerinə düşər: “Bu il “Kənd təsərrüfatı ili” elan edilmişdir. Bu da bu sahəyə ayrılan diqqətin təzahürüdür. Sənaye, kənd təsərrüfatı hər bir ölkənin uğurlu iqtisadi inkişafının təminatıdır. Bizim Azərbaycan əhalisinin təxminən yarısı bölgələrdə, kəndlərdə yaşayır. Ərzaq təhlükəsizliyi bizim üçün prioritetdir. Amma biz hələ də ərzaq təhlükəsizliyini tam şəkildə təmin etməmişik. Ancaq bu sahədə böyük yol keşmişik. Bu gün Azərbaycan özünü əsas ərzaq məhsulları ilə təmin edir. Bəzən bu məhsullar üçün lazım olan komponentlər idxal edilir. Bu, bəlkə də birinci mərhələ üçün məqbul variantdır. Ancaq çalışmalıyıq ki, Azərbaycanda istehsal olunan bütün məhsulların komponentləri də burada istehsal olunsun, toxumdan tutmuş, hazır məhsullara qədər.”
Cənab Prezidentin bu fikrindən yola çıxaraq demək istəyirəm ki, “Kənd təsərrüfatı ili” çərçivəsində müəyyən edilən hədəflərə çatmaqda aqrar sahədə çalışanların üzərinə böyük məsuliyyət düşür.
Azərbaycanda cənab Prezidentin dediyi kimi bir istehsal mühitinin yaradılması üçün kifayət qədər imkanlarımız var. Fəaliyyət göstərdiyim şimal bölgəsinin - Qusar rayonunun zəhmətkeş insanları, əlverişli cöğrafi iqlimi, münbit və məhsuldar torpağı vardır. Burada müəyyən toxum istehsalı müəssisələrinin və toxum saxlayıcı bazaların yaradılması yerinə düşərdi. Çünki, hava şəraitinin istənilən zaman respublikanın digər bölgələrinə nisbətən sərinliyi bu sahənin inkişafına xüsusi zəmin yaradır. Buna İlham Əliyevin imzaladığı dövlət proqramları da tam zəmanət verir.
Təbii ki, bizim işimizdə yaranan bəzi əngəllər bəzən xırda xarakter daşısa da, məhsuldarlığa da, insanlara lazımi məhsulların vaxtında və keyfiyyətli təqdimatına da təsirsiz ötüşmür.
Mən 2008-ci ildən Qusarda sahibkarlıqla məşğulam. Müxtəlif vaxtlarda taxıl istehsalı, meyvə-tərəvəz yetişdirilməsi, toxum istehsalı ilə məşğul oluram. Bu məsələdə vacib olan məqamlardan biri texnika və gübrə məsələsidir ki, burada “Aqrolizinq” şirkətinin xidmətlərindən istifadə edirəm. Pomidor, xiyar, paxla, badımcan, bibər, kələm, qovun, qarpız kimi kənd təsərrüfatı məhsullarının istehsalında hər iki detal olduqca zəruridir. "Aqrolizinq" bu sahədə kənd təsərrüfatı müəssisələri rəhbərlərinə kifayət qədər dəstək göstərir. Amma buradakı texniki vasitələrinin yenilənməsinə, yeni texnika növlərinə böyük ehtiyac var.
Təəssüf hissi ilə qeyd edim ki, onların təklif etdiyi modellər köhnədir, tez-tez sıradan çıxır. Məcbur olub sahibkar özü texnika almalı olur ki, bu da öz növbəsində müəyyən problemlər yaradır. Bu sahədə yenilənmə, yeni texniki vasitələrin olması həm məhsuldarlığın və səmərəliliyin artmasına, həm qiymətlərin aşağı düşməsinə, həm də işçilərin maaşının artırılmasına imkan yaradar. Bölgələrdə kənd təsərrufatı sahəsində müasir texnologiyadan baş çıxaran peşəkar, səriştəli kadrların olmaması da ən aktual problemlərdən biri olaraq qalır. Gənclər arasında ixtisaslı kənd təsərrüfatı mütəxəsisləri azlıq təşkil edir.
Məktəblərdə uşaqların əmək dərsləri proqramlarına kənd təsərrüfatı ilə yaxından tanışlığı təmin edən dərslərin salınmasına, bu sahədə mütəxəssislərin yetişməsi üçün uzun müddətli dövlət proqramına ehtiyac hiss edirik. Əminəm ki, bu gənclərimizin kənd təsərrüfatı sahələrinə həvəs və istəklərini artmasına səbəb olar, onların öz doğma yurdlarını tərk edərək qazanc dalınca başqa ölkələrə və şəhərlərə getməsini əngəlləyər. Banklarda kənd təsərrüfatı sahəsində çalışanlara kredit imkanlarının genişləndirilməsi, güzəştli subsidiyaların artırılması, yetişdirilən məhsullar üçün alıcı təşkilatların yaradılması da işimizdə tez-tez ehtiyac hiss etdiyimiz problemlərdəndir.
Mən işimizdə rastlaşdığımız bəzi məqamları sadalamaqla bunların tezliklə öz həllini tapacağına əminliyimi də vurğulamaq istəyirəm. Ölkəmizdə kənd təsərrüfatı sahəsinin inkişafına yönəlik tədbirlərin intensivləşməsi, həyata keçirilən islahatlar bunu aydın şəkildə göstərir, böyük ümidlər vəd edir. Cənab Prezidentin bu sahədə irəliləyişə nail olmaq üçün göstərdiyi cəhdlərə hər bir vətəndaş öz işi ilə dəstək durarsa, dövlət və dövlətçiliyimiz yolunda vəzifələrimizin yerinə yetirilməsinə layiqincə səy göstərərsə “Kənd təsərrüfatı ili”nin başlanğıcı kimi sonu da uğurlu olacaq. Buna ürəkdən inanırıq.
Jalə ƏMİRBƏYOVA
Qusar rayonu, sahibkar
