Modern.az saytının məlumatına görə bunu Atlas Araşdırmalar Mərkəzinin rəhbəri, politoloq Elxan Şahinoğlu deyib.
O, ABŞ dövlət katibinin müavini Viktoriya Nulandın Moskvaya səfərini şərh edərkən bildirib ki, Rusiya prezidenti Vladimir Putin ABŞ rəsmisi Nulandı qaraladı, daha sonra qalanları hücuma keçdi.
“Bu gün Nuland Moskvada idi. Onu Moskvada da aşağılamağa çalışdılar, öyrədilmiş jurnalistləri üstünə göndərdilər. Ancaq xanım Nuland soyuqqanlığını qorudu. Nulandı Moskvada nə prezident Putin, nə də xarici işlər naziri Lavrov qəbul etdi. Saymadılar onu”.
Ekspert xatırladıb ki, yeri gəlmişkən, Viktoriya Nulandı Bakıda prezident İlham Əliyev qəbul edib. “Rəsmi Bakı Vaşinqtonun siyasətini tənqid etməsinə rəğmən, qonaqların ölkəyə ziyarətlərdə diplomatik etikanı gözləyir”,-deyə o politoloq əlavə edib.
Xatırladaq ki, Viktoriya Nuland ötən gün Moskvaya səfər gəlib. Onun rəsmi səfər proqramı isə bu gün başlayıb.
Onu da qeyd edək ki, bundan öncə ABŞ dövlət katibi Con Kerri Soçidə xarici işlər naziri Sergey Lavrovla və prezident Putinlə görüşüb.
Ekspertlərin fikrincə, Kerrinin Soçiyə səfəri ABŞ-la Rusiya arasındakı soyuq münasibətlərin normallaşması üçün atılan mühüm addımdır.
Aqşin Kərimov
