Azərbaycanın xalq artisti, rejissor Əbdül Mahmudov məşhur Hollivud aktyoru Corc Kulinini beynəlxalq məhkəməyə verəcək. Bu barədə Modern.az saytına əməkdar incəsənət xadimi olan rejissorun özü məlumat verib:
“Bu yolda mənə sizin və bütün medianın dəstək olmasını istəyirəm. Məşhur amerikan aktyor Corc Kulini qondarma “erməni soyqırımı” ilə bağlı ABŞ Senatına etiraz edib. Senata bildirib ki, “siz türk ölkələri ilə biznes maraqlarına görə bu “soyqırımı”nı qəbul etməmisiniz”. Yəqin ki, sizin də xəbəriniz var: ABŞ Senatı qondarma “erməni soyqırımı” ilə bağlı məsələni oxunuşa çıxarmadı. Həmin aktyor da buna etiraz edib. Görünür burada erməni lobbisinin və diaspor təşkilatlarının əli var. Çünki onların diasporları bizdən fərqli olaraq yaxşı işləyir”.
Xalq artisti bu barədə artıq işə keçdiyini də bildirib:
“Xarici İşlər Nazirliyinə də getmişəm. Buradakı səfirliyə də müraciət etdim. Daha bir neçə qurumla da danışacağam. Hazırda Corc Kuluniyə böyük bir cavab hazırlayıram. Onu beynəlxalq məhkəməyə vermək fikrim var. Mən ondan tələb edəcəyəm ki, yoldan çəkilsin”.
Əbdül Mahmudov məşhur aktyoru Bakıya da dəvət etmək istəyir:
“Məktub hazırlamışam. Rəsmi qurumlardan da mənə dedilər ki, “elə sizin kimi ziyalıların vətəndaş mövqeyi göstərərək məsələyə qarışması daha yaxşıdır”. Lazım gəlsə, mən onu Bakıya dəvət edərəm və öz çəkdiyim “Qan yaddaşı” filmini ona göstərərəm. “Qan yaddaşı” sənədli filmdir. Filmdə hər bir fakt mənbələrə söykənib. Orada göstərmişəm ki, ermənilər Qafqazda necə məqsədli şəkildə istifadə olunub. Kuluni bunları bilmirsə, mən ona filmi göstərə bilərəm. Bu məsələyə sizlərin də qoşulmasını istəyirəm. Biz öz həqiqətlərimizi dünyaya çıxarmalıyıq. Qapı-qapı gəzirəm, amma filmin dublyajı üşün laızm olan 10 min manatı kimdənsə tapa bilmirəm. Biz bu filmi dublyaj edib, kənara çıxarmalıyıq”.
Qeyd edək ki, məşhur aktyor-rejissor Corc Kluni bir müddət öncə qondarma “erməni soyqırımı”nı dəstəklədiyini və ABŞ Senatının bunu oxunuşa çıxarmamasını tənqid etdiyini bildirib.
Elmin NURİ
