Azərbaycanda ərzaq məhsullarının qiymətlərində növbəti bahalaşma müşahidə edilir. Modern.az xəbər verir ki, fevral ayında devalvasiyadan sonra ərzaq məhsullarının qiymətlərində cüzi artım başladı. Həmin dövrdən bu günə kimi qiymətlərdə artım günü-gündən çoxalmaqdadır.
Bu gün Azərbaycan bazarının böyük hissəsini “Procter&Gamble” şirkətinin məhsulları tutur. Alıcılar son günlər həmin istehlak mallarında da artımın olduğunu müşahidə edirlər. Alıcılar qeyd edirlər ki, bir müddət öncə aldıqları məhsullara indi 30-40 qəpik artıq xərcləyirlər. Əmək haqlarında artım olmadığı bir zamanda qiymətlərin durmadan artması isə ailələrin büdcəsinə mənfi təsir edir.
“Procter&Gamble”nin xarici əlaqələr üzrə meneceri Səkinə İbrahimova Modern.az-a bildirib ki, şirkətin məqsədi həmişə Azərbaycan istehlakçılarını yüksək istehsal və dəyərlə təmin edən etibarlı markalar təqdim etmək olub:
“P&G’nin təklif edilən qiymət dəyişiklikləri makroiqtisadi şəraitin təsirini və bizim uzun müddətli rəqabət qabiliyyətini təmin etmək niyyətimizi əks etdirir. Mağazaların rəflərində olan qiymətlər pərakəndə satıcıların mülahizəsinə əsasən təyin edilir və P&G heç bir halda müştərilərin pərakəndə satıcıların qiymətləndirmə ilə bağlı qərarlarına təsir etmir. Bir qayda olaraq, biz bazar qiyməti barədə də şərh vermirik”.
Aytən ZƏHRA