"BP-Azerbaijan"ın "Azəri" yatağında əməliyyatlar üzrə meneceri Elxan Məmmədov şirkətin hasilat üzrə yeni vitse-prezidenti təyin edilib. BP-nin mətbuat xidmətindən Modern.az-a verilən məlumata görə, Elxan Məmmədov yeni vəzifəsinə yanvarın 1-dən başlayacaq.
Elxan Məmmədov BP-nin Azərbaycanda texniki sahəyə məsul olan ilk vitse-prezidentidir.
Bu vəzifədə E.Məmmədov BP-nin Azərbaycan, Gürcüstan və Türkiyə regionu üzrə hasilat işlərinin idarə olunmasına cavabdeh olacaq. Bundan əlavə, o həm də Azəri-Çıraq-Günəşli (AÇG) üzrə Texniki Qrupa sədrlik edəcək

Vitse-prezident rolunda Elxan Məmmədoiv yeni vəzifəyə gedəcək Pat Droonu əvəz edəcək və BP-nin regional rəhbər qrupunun üzvü olacaq, bu da BP-nin kadrların milliləşdirilməsi planına uyğundur

Elxan Məmədov BP-yə 2001-ci ildə “Çıraq” platformasında nəzarət-ölçü cihazları üzrə texnik kimi qoşulub. Sonra o, BP-nin Şimal dənizində və Xəzərdəki müxtəlif platformalarında çalışıb. Daha sonra “Çıraq” platformasının meneceri və 2009-cu ildə isə BP-nin Azərbaycan üzrə quru əməliyyatları meneceri təyin olunub.   2013-cü ilin iyun ayından BP-nin “Azəri” sahəsi üzrə əməliyyatlar meneceridir.

Elxan Məmmədov 2011-ci ildə ABŞ-ın Boston şəhərindəki Massaçusets Texnologiya İnsitutunun Əməliyyatlar Academiyasını bitirib. O, əməliyyatlar üzrə ən yüksək Pol Martins mükafatına layiq görülüb, BP-nin Azərbaycan, Gürcüstan və Türkiyə regionu üzrə əməliyyatlar sahəsində ixtisas forumunun sədri və regionun texniki forumunun həmsədridir.
2014-cü ildə Elxan Məmmədov Azərbaycan Prezidenti tərəfindən ölkənin neft və qaz sənayesinin inkişafına töhfəsinə görə  “Tərəqqi” medalına layiq görülüb. Ailəlidir, üç övladı var.
 
Aytən ZƏHRA