Milli Məclisdə müxtəlif ölkələrlə parlamentlərarası əlaqələr üzrə ümumilikdə 100-dən çox işçi qrupu fəaliyyət göstərir. Bu qruplar Avropa, Asiya, Afrika, Amerika və Okeaniya regionlarını əhatə etməklə Azərbaycanın qanunverici səviyyədə geniş beynəlxalq əlaqələr şəbəkəsinə malik olduğunu göstərir. Parlamentlərarası işçi qrupları deputatlardan ibarət olmaqla konkret ölkələrlə siyasi dialoqun qurulması, qarşılıqlı səfərlərin təşkili, qanunvericilik təcrübəsinin mübadiləsi və əməkdaşlığın dərinləşdirilməsi məqsədi daşıyır.
Bu mexanizm parlament diplomatiyasının əsas alətlərindən biri hesab olunur və dövlətin rəsmi xarici siyasət kursunu qanunverici müstəvidə dəstəkləyir. Eyni zamanda, Azərbaycanın milli maraqlarının xarici parlamentlərdə müdafiəsi, beynəlxalq imicinin gücləndirilməsi və strateji tərəfdaşlıq münasibətlərinin möhkəmləndirilməsi baxımından mühüm rol oynayır. İşçi qruplarının sayı və tərkibi ölkənin xarici siyasət prioritetlərini və hansı istiqamətlərə xüsusi önəm verdiyini aydın şəkildə nümayiş etdirir.
Modern.az saytı ən çox və az üzvü olan işçi qruplarını dəqiqləşdirməyə çalışıb.
Araşdırma nəticəsində məlum oldu ki, ən böyük tərkibə malik işçi qrupu 53 nəfər üzvlə Azərbaycan-Türkiyə parlamentlərarası əlaqələr üzrə işçi qrupudur. Bu, iki ölkə arasındakı strateji müttəfiqlik və “bir millət, iki dövlət” prinsipi fonunda elə də təəccüblü deyil.
İkinci yerdə Azərbaycan-Rusiya işçi qrupu (42 nəfər), üçüncü yerdə isə Azərbaycan-Özbəkistan işçi qrupu (32 nəfər) qərarlaşıb.
Digər geniştərkibli qruplara aşağıdakılar aiddir:
Azərbaycan-Qazaxıstan - 28 nəfər
Azərbaycan-Serbiya - 26 nəfər
Azərbaycan-Çin - 24 nəfər
Azərbaycan-Belarus - 23 nəfər
Azərbaycan-BƏƏ - 22 nəfər
Azərbaycan-İtaliya - 22 nəfər
Bu statistika göstərir ki, Azərbaycan xüsusilə türk dövlətləri, region ölkələri və böyük siyasi-iqtisadi aktorlarla parlament diplomatiyasına xüsusi önəm verir.
Ən az üzvü olan işçi qrupları
Ən kiçik tərkibə malik işçi qrupu 2 nəfər üzvlə Azərbaycan-Əfqanıstan parlamentlərarasıişçi qrupudur.
Digər kiçik tərkibə malik parlamentlərarası işçi qrupları isə aşağıdakılardır:
Azərbaycan-Cibuti - 3 nəfər
Azərbaycan-Ekvador - 3 nəfər
Azərbaycan-Liviya - 3 nəfər
Azərbaycan-Nepal - 3 nəfər
