“Serj Sarkisyan 2018-ci ildə “Dağlıq Qarabağ danışıqlar”ının çıxılmaz vəziyyətə düşdüyünü bildirmişdi. O, həmçinin Azərbaycanın məsələni hərbi güclə həll etməyə cəhd etməyəcəyinə ümid bəslədiyini söyləmişdi”.
Modern.az xəbər verir ki, bunu Ermənistan parlamentinin hakim “Vətəndaş Müqaviləsi” Partiyasından olan sədr müavini Ruben Rubinyan 3 dekabrda jurnalistlərlə söhbətində bildirib.
"44 günlük müharibə niyə başladı? İki səbəbə görə. Birinci və əsas səbəb odur ki, 1998-ci ildən etibarən Ermənistanla Azərbaycan arasında hərbi büdcələrin nisbəti praktik olaraq bərabər idi və Robert Köçəryanın Ermənistandakı prezidentlik müddətini başa çatanda bu nisbət Azərbaycanın xeyrinə 1-ə 5 idi. Serj Sarkisyanın prezidentliyi dövründə bu fərq daha da artdı və biz bu böyük büdcə fərqini miras aldıq, yeri gəlmişkən, onu da azaltdıq. Eyni zamanda, Köçəryanın və Sarkisyanın ailə büdcələri artdı", - Rubinyan qeyd edib.
O, ikinci səbəbi danışıqlar paketinin əvvəlcə 7 rayonun Azərbaycana qaytarılmasına və "Dağlıq Qarabağ"la nə etmək lazım olduğuna yönəlməsi kimi göstərib.
""Dağlıq Qarabağ"a gəldikdə isə nə baş verəcəyi bəlli deyildi. Bu halda, həmin anda nə baş verdiyini bilmək lazımdır. Və həmin anda hamı "Dağlıq Qarabağ"ı Azərbaycanın bir hissəsi kimi tanıyırdı.
Bu arada, danışıqlar paketlərinin şərtləri getdikcə pisləşirdi və Azərbaycan hətta onlarla razılaşmırdı, çünki hər bir ardıcıl sənəd onun üçün əvvəlkindən daha yaxşı idi.
Tərəflərdən ən azı birinin - Ermənistanın- sonuncu dəfə razılaşdığı yeganə sənəd Kazan sənədi idi. Azərbaycanın razılaşdığı, lakin Ermənistanın rədd etdiyi bir sənəd yox idi", - Rubinyan vurğulayıb.
Onun sözlərinə görə, Serj Sarkisyan özü bildirib ki, 2019-cu il sənədinin əsasını təşkil edən 2018-ci il sənədinə əsasən, Ermənistan tərəfi real ərazi güzəştlərinə gedir, Azərbaycan isə yox.
"O deyir ki, "Dağlıq Qarabağ"ın ara və yekun statusu məsələsi qeyri-müəyyən olaraq qalır və əlavə edir ki, Azərbaycan növbəti addım olaraq qalan ərazilər üzərində nəzarəti ələ keçirməyə çalışacaq. Üstəlik, bu sənəddə Laçın (Laçın dəhlizi istisna olmaqla) və Kəlbəcər rayonlarının "Dağlıq Qarabağ"ın nəzarəti altında qaldığı birbaşa göstərilmir.
Əgər müxalifət bizi xain adlandırırsa, niyə 2016-cı ildə təklifləri özləri qəbul etmədilər, əgər o təkliflər bu qədər yaxşı idisə? Əgər bu təkliflər pis idisə, niyə müxalifət bizi günahlandırır və niyə onları qəbul etmədiyimizi soruşur?", - Rubinyan vurğulayıb.
O, inanır ki, hər halda itkilər olacaqdı və müharibə Ermənistan tərəfi üçün daha pis başlanğıc mövqeyindən başlayacaqdı.
Vitse-spiker Ki-Uestlə bağlı danışıqlar paketinin olmaması məsələsini "Levon Ter-Petrosyan, Robert Köçəryan və Serj Sarkisyanın sevgi üçbucağına" aid edib.
O, 2022-ci il Praqa Bəyannaməsinin 9 noyabr 2020-ci il tarixli bəyanatın mahiyyətində heç bir dəyişiklik etmədiyini söyləyib.
"Bundan əlavə, "Dağlıq Qarabağ"dakı Rusiya sülhməramlılarının funksiyalarında heç bir dəyişiklik edilməyib", - deyə Rubinyan fikrini yekunlaşdırıb.
