Rusiya prezidentinin mətbuat katibi Dmitri Peskovun mənşəyi açıqlanıb.
Modern.az xəbər verir ki, bu barədə "Proyekt" jurnalının məqaləsində bildirilib.
Məlum olub ki, Dmitri Peskovun mənşəyi partiya və kəşfiyyat xətlərinin sıx bağlı olduğu sovet nomenklaturasındandır.
Dmitri Peskovun ana babası Yakov Zevin 1918-ci ildə güllələnmiş 26 Bakı komissarından biri imiş. Y.Zevin 1917-ci ildə yaranan Bakı kommunasında əmək üzrə xalq komissarı olub.
Ölümündən sonra SSRİ rəhbəri Vladimir Lenin şəxsən onun dul qadınına Moskvada mənzil verib.
Peskovun ulu babası vaxtilə Leninin həyat yoldaşı Nadejda Krupskaya ilə birlikdə Xalq Təhsil Komissarlığında işləyib və Lenin ailəsinin yaxın dostu hesab olunub.
Dmitri Peskovun anası Nadejda Zevina Qırmızı Ordu Hərbi Hava Qüvvələrinin partiya "təmizləmələrində" iştirak edib və ömrünün son illərində Lenin Muzeyində çalışıb.
Bioqraflar qeyd edirlər ki, onun xidmət yerləri haqqında məlumatlar kəşfiyyat zabitləri üçün xarakterik olan kimi məxfi saxlanılır. Ailə Presnya küçəsindəki elit bir binada yaşayıb, buradakı qonşular arasında “KQB” və xarici ticarət rəsmiləri də var idi.
Nəşrin məlumatına görə, Peskovun atası, Asiya və Afrika Araşdırmaları İnstitutunun məzunu Sergey Peskov “soyuq müharibə” dövründə sovet kəşfiyyat zabitləri üçün klassik örtük olan "dostluq icmaları" adı altında uzun illər Yaxın Şərqdə xidmət edib.
Dmitri Peskov diplomat ailəsində anadan olub və uşaqlığı ezamiyyətlər dövründə keçib. Onun uğurlu karyerası iki evlilikdən sonra başlayıb. İlk həyat yoldaşı Marşal Semyon Budyonnının nəvəsi Anastasiya olub və onun sayəsində diplomat kimi ilk xarici təyinatını Türkiyəyə alıb.
Anastasiyadan ayrıldıqdan sonra Dmitri Peskov diplomat Vladimir Solotsinskinin qızı Yekaterina ilə evlənib. Məhz Vladimir Solotsinski Peskovu Rusiyanın eks-prezidenti Boris Yeltsini 1999-cu ildə Türkiyəyə səfərində müşayiət etməsini tövsiyə edib.
1999-cu ildə Boris Yeltsini Türkiyəyə səfər edəndə Peskov Rusiyanın Anlaradakı səfirliyinin 1-ci katibi vəzifəsində işləyib. O, Yeltsinlə Türkiyə prezidenti Süleyman Dəmirəlin görüşünə tərcüməçilik edib. Məhz o görüşdə Peskovun ruscadan türkçəyə tərcüməçilik məharəti Boris Yeltsinin çox xoşuna gəlib. Bu məharət onun sonrakı karyerasına müsbət təkan verib.
Beləliklə, Peskovun Kremlə yolu açılıb və nəticədə tədricən Vladimir Putinin baş media strateqi, prezidentin ictimai imicinə cavabdeh olan şəxsə çevrilib.
D.Peskov 2012-ci il mayın 22-dən Rusiya Federasiyası Prezidenti Administrasiyası rəhbərinin müavini - Rusiya Federasiyası Prezidentinin mətbuat katibidir. O, Rusiya Federasiyasının 1-ci dərəcəli dövlət müşaviri rütbəsi daşıyır.
A.Qorxmaz
