Aprelin 8-də Türkiyə Azərbaycan Dərnəkləri Federasiyasının (TADEF) rəhbər və üzvləri İstanbulda oxuyan azərbaycanlı tələbələrlə birgə Azərbaycanın İstanbul şəhərindəki Baş Konsulluğunun qarşısına toplaşaraq Ermənistan dövlətinin son günlər törətdiyi hərbi təxribatlarla əlaqədar Azərbaycan dövlətinə dəstək aksiyası keçiriblər.
Diasporla iş üzrə Dövlət Komitəsindən Modern.az saytına verilən məlumata görə, QHT nümayəndələrinin də qatıldığı dəstək aksiyasında iştirakçılar Azərbaycan və Türkiyə bayraqlarını dalğalandıraraq "Qarabağ bizimdir", "Yaşasın Türkiyə, Azərbaycan dostluğu və qardaşlığı", “İgid əsgər,dik dayan!” “Mən fəxr edirəm ki, azərbaycanlıyam!” yazılı şüarlar səsləndiriblər.
Çıxış edənlər Ermənistan silahlı birləşmələrinin atəşkəsi pozması nəticəsində insan tələfatı və dağıntılara səbəb olan hadisələri pisləyib, həlak olan azərbaycanlılar üçün kədərləndiklərini ifadə ediblər. Aksiyada Ermənistan dövlətinin təcavüzkarlıq siyasəti pislənilib, işğalçı dövlət müvafiq beynəlxalq müqavilələrə və hüquq normalarına əməl etməyə çağırılıb.
İştirakçılar Azərbaycan dövlətinə və xalqına dəstək ifadə edib, Türkiyə-Azərbaycan dostluğunun əbədi olacağını dilə gətiriblər. Qeyd edək ki, TADEF-in təşəbbüsü ilə dünən Kocaelidə də Azərbaycana dəstək mitinqi keçirilib.
Gülşən RAUFQIZI
