Modern.az xəbər verir ki, Baş Prokurorluğun mətbuat xidməti bir neçə gün öncə Nizami rayonu ərazisində baş verən ölüm faktı ilə bağlı məlumat yayıb. Söhbət polislər tərəfindən döyülərək öldürüldüyü iddia edilən Elvin Əsgərovdan gedir. “Toplanmış ilkin istintaq materialları ilə müəyyən edilmişdir ki, 2011-ci il yanvarın 13-də saat 01 radələrində "Neon" şadlıq sarayının yaxınlığında Bakı şəhər sakinləri Anar Qəniyev, Elvin Əsgərov və başqaları sərxoş halda ictimai qaydanı pozmaqla mübahisə etmişlər. Həmin ərazidə ictimai qaydanın və ictimai təhlükəsizliyin təmin edilməsi ilə əlaqədar xidməti vəzifələrini yerinə yetirən Daxili İşlər Nazirliyinin Çevik Polis Alayının əməkdaşları onlara yaxınlaşıb intizama dəvət etmiş və şəxsiyyətlərini təsdiq edən sənədlərini yoxlamaq istəmişlər. Onlar polis əməkdaşlarının qanuni tələblərinə tabe olmayaraq hadisə yerindən qaçmağa başlamışlar. Bu zaman Elvin Əsgərov özündə olan açılıb-qatlanan bıçaqla onu təqib edən polis əməkdaşları - Elçin Mütəllimova və Zülfüqar Süleymanova bədən xəsarətləri yetirmişdir. O, bundan sonra da hadisə yerindən qaçmaqda davam edərkən bir neçə dəfə yerə yıxılmasına baxmayaraq, ayağa qalxmış, köməyə çağırılmış polis əməkdaşlarına da müqavimət göstərərək onlardan birinə - Səbuhi Ağayevə bıçaqla xəsarət yetirsə də saxlanılmışdır. Xəsarət almış polis əməkdaşları tibbi yardım göstərilməsi üçün xidməti avtomaşınla rayon ərazisində yerləşən 6 saylı köməkçi təcili tibbi yardım stansiyasına, Elvin Əsgərov isə 24-cü Polis Bölməsinə aparılmışdır. Sonuncu orada olarkən səhhəti pisləşdiyindən çağırış əsasında saat 01:15-də təcili tibbi yardım maşını ilə 3 saylı şəhər klinik xəstəxanasına çatdırılmışdır. Lakin ona davamlı şəkildə ilkin tibbi yardım göstərilməsinə baxmayaraq vəfat etmişdir”-deyə Baş Prokurorluğun məlumatında bildirilib.
Qurumun məlumatına görə, faktla bağlı Nizami rayon prokurorluğunda Azərbaycan Respublikası Cinayət Məcəlləsinin 315.2-ci maddəsi ilə cinayət işi başlanılıb istintaq aparılır. Bakı şəhər və Nizami rayon prokurorluqları əməkdaşlarının iştirakı ilə hadisə yerinə baxış keçirilərək oradan qan nümunələri və cinayətin aləti olan bıçaq aşkar edilib götürülüb. Elvin Əsgərovun ölümünün səbəblərinin, bədənindəki xəsarətlərin ağırlıq dərəcəsinin və törənmə mexanizminin müəyyənləşdirilməsi üçün məhkəmə-tibb və digər müvafiq ekspertizalar təyin edilib.
“Hazırda zərərçəkmişin valideynlərinin irəli sürdükləri xüsusatlar araşdırılır, hadisəni görmüş şahidlərin müəyyən edilməsi, dindirilməsi və digər zəruri istintaq hərəkətləri yerinə yetirilir. Qeyd edilən cinayət işi üzrə istintaqın tam, hərtərəfli və obyektiv aparılmaqla, toplanmış sübutlar əsasında cinayəti törətmiş şəxslərin əməllərinə hüquqi qiymət verilməsi təmin ediləcəkdir”.
Xatırladaq ki, E.Əsgərovun valideynləri mətbuata verdikləri açıqlama oğlanlarının Çevik Polis Alayının əməkdaşları tərəfindən dəyənəklərlə döyülərək öldürüldüyünü iddia edirlər. Onlar qatillər həbs olunmayanadək sakit oturmayacaqlarını bəyan ediblər.
Modern.az
