Bir qədər əvvəl yayılan məlumata görə, Qırğızıstanın devrilmiş prezidenti Kurmanbek Bakiyev Qazaxıstandan ayrılıb. Modern.az qazax mənbələrinə istinadən xəbər verir ki, Bakiyev bu gün günorta saatlarından sonra Qazaxıstanı tərk edib. Qırğız liderinin hansı səmtə yollanmasə barədə məlumat verilmir. Lakin Qırğızıstanın müvəqqəti hökuməti onun Türkiyəyə uçmasını istisna etməyib. "İnterfaks" agentliyi Bakiyevin Qazaxıstanı tərk etməsi faktını təsdiqləyərək onun Türkiyəyə gedə biləcəyini bildirib. Əldə olunan məlumata görə, qırğız müvəqqəti hökumətin sədr müavini Almazbek Atambayev Türkiyədədir. Bakiyevin Atambayevlə danışıqlar aparmaq üçün Ankaraya getdiyi ehtimal olunur. Beləliklə Qırğızıstanda Bakiyev və müvəqqəti arasında baş tutmayan danışıqların Türkiyədə aparılması nəzərdə tutulub.
Qeyd edək ki, bu gün müvəqqəti hökuməti Bakiyevin istefa ərizəsinin əslini alıb. Bakiyev istefa ərizəsində aprelin 7-də baş verənləri silahlı çevriliş adlandırıb. O ölkənin imicinə böyük zərər dəydiyini bildirib. Bakiyev baş vermiş olaylara görə məsuliyyətin müvəqqəti hökumətin üzərinə düşdüyünü deyib. “Qırğız xalqının gələcəyi, dövlətin bütövlüyü və varlığı üçün Konsitusiyanın 50-ci maddəsinin tələbinə uyğun olaraq istefa verirəm”,-deyə Bakiyev istefa ərizəsində bildirir.
