2014-cü ilin oktyabrından “Borçalı” cəmiyyətinin sədri Zəlimxan Məmmədlinin Gürcüstana daxil olmasına qadağa qoyulub. Dəfələrlə Gürcüstan hökumətinə müraciətlər olsa da, hələ ki, yekun fikir söylənilməyib. Zəlimxan Məmmədli isə ona qarşı qadağanı cəmiyyətə təzyiq kimi qiymətləndirib.
Modern.az-a açıqlamasında Zəlimxan Məmmədli deyib ki, Novruz bayramı ərəfəsində Gürcüstana buraxılmasına daha çox ümid edib.
“Çünki son limit olaraq mart ayının 21-nə qədər Gürcüstana buraxılacağımı bütün hallarda gözləyirdim. Düşünürdüm ki, mənim Gürcüstanda doğulduğumu nəzərə alaraq Novruz bayramı ərəfəsində Gürcüstana buraxılmağımı təmin edərlər. Təəssüflər olsun ki , Gürcüstan hakimiyyətinin təfəkküründə öz xalqı da daxil, sağlam olmayan bir yanaşma var. Ona görə də məsələ əvvəlki vəziyyətdə qalıb”.
“Borçalı” cəmiyyətinin sədri qeyd edib ki, Azərbaycan türkləri ilə bu cür davranış sərgiləmək olmaz.
“Azərbaycanın bütün rəsmi qurumlarından, parlamentdən tutmuş bütün siyasi spektr Gürcüstan rəhbərliyinə müraciət edib. Türkiyədəki dostlarımız da Gürcüstana getməyimin təmin olunması üçün müraciət edib. Özümüz də hüquqi və mənəvi tərəfdən əlimizdən nə gəlirsə onu etmişik. Hər hansı günah sahibi deyilik.
Sadəcə, günahımız ondan ibarətdir ki, soydaşlarımızın fəallığını, siyasi proseslərə müdaxilə və yaxud da inteqrasiya etməsini istəyirik. Əgər bu günah kimi qəbul edilirsə deməli, Gürcüstan hakimiyyəti idarə sistemini bacarmır. Ümumiyyətlə, bölgədəki Azərbaycan türkləri ilə bu cür davranış sərgiləmək yaxşı nəyinsə baş verəcəyini şübhə altına alır”.
Namidə BİNGÖL
