Bakıda BMT-nin İqlim Dəyişikliyi üzrə çərçivə Konvensiyasının Tərəfləri Konfransının 29-cu sessiyası (COP29) davam edir. Bu gün tədbirin üçüncü günüdür.
Modern.az-ın məlumatına görə, dünyanın 100-ə yaxın ölkəsinin lideri tədbirdə iştirak etmək üçün Bakıya gəlib.
COP29 tədbiri yüksək səviyyədə təşkil olunub. Ölkəmizə gələn qonaqlar çox xoş vaxt keçirirlər. Hətta ölkəmizdə olan liderlər də bu fürsətdən istifadə edirlər.
Finlandiya Prezidenti Dağüstü Parkda
Finlandiya Prezidenti Aleksandr Stubb özünün sosial media hesabında Dağüstü Parkdan foto paylaşıb. O, Bakıda Azərbaycan Prezidenti İlham Əliyevlə də görüş keçirib.
Tədbir iştirakçısı ölkələrin liderlərinin qeyri-rəsmi şam yeməyi
COP29 tədbiri ilə bağlı ölkəmizdə səfərdə olan Belarus Prezidenti Aleksandr Lukaşenko və Birləşmiş Ərəb Əmirliklərinin Prezidenti Şeyx Məhəmməd bin Zayed Al Nəhyan Bakıda qeyri-rəsmi şam yeməyində görüşüblər. Belarus liderinin mətbuat xidmətindən bu barədə məlumat yayılıb. Bildirilib ki, Lukaşenko BƏƏ Prezidenti tərəfindən qeyri-rəsmi şam yeməyinə dəvət olunub. Şam yeməyində BƏƏ nümayəndə heyəti, İordaniya Haşimilər Krallığının vəliəhdi şahzadə II Əl-Hüseyn bin Abdullah və Albaniyanın Baş naziri Edi Rama da iştirak edib.
Qana və Monteneqro Prezidentlərinin təsadüfi qarşılaşması
BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası çərçivəsində ölkəmizdə səfərdə olan dünya liderləri Bakının tarixi mərkəzi, UNESCO Dünya İrs Siyahısında olan İçərişəhəri ziyarət ediblər. Bu liderlər arasında Qana Prezidenti N. Akufo-Addo və Monteneqro Prezidenti Yakov Milatoviç də olublar. Ziyarət zamanı hər iki ölkə başçısı təsadüfən İçərişəhərdəki Ənənəvi İncəsənət Mərkəzində qarşılaşıb, söhbət ediblər.
Avropa İttifaqı Şurasının Prezidenti Şarl Mişelin İçərişəhər gəzintisi
Avropa İttifaqı Şurasının Prezidenti Şarl Mişel də İçərişəhəri ziyarət edib. O, UNESCO Dünya İrs Siyahısına daxil olan İçərişəhəri ziyarəti zamanı onun zəngin tarixi irsi və memarlıq inciləri ilə yaxından tanış olub.
Liderlər Sammitində konsert
COP29 Liderlər Sammitində liderlərin çıxışından sonra mədəni proqram təqdim edilib. Bu hissədə Azərbaycanın paytaxtı və regionlarına həsr olunmuş videoçarx nümayiş etdirilib.
Eyni zamanda bunun fonunda qonaqlara incəsənət nümayəndələrinin, müğənnilərin, ifaçıların və rəqqasların iştirakı ilə konsert proqramı təqdim edilib. Mədəni hissə 36-cı dəqiqədən başlayır:
Dövlət və hökumət başçılarının şərəfinə ziyafət
Noyabrın 12-də Bakıda, Gülüstan sarayında Azərbaycan Respublikasının Prezidenti İlham Əliyevin adından BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Liderlər Sammitinin açılış mərasimində iştirak edən dövlət və hökumət başçılarının şərəfinə ziyafət verilib.
Prezident İlham Əliyev və birinci xanım Mehriban Əliyeva tədbirdə iştirak ediblər.
Belçika Baş nazirinin Bulvarda qaçır
Noyabrın 11-də Bakıya gələn Belçika Baş naziri Aleksandr De Kro Bakı bulvarında bu ölkənin Azərbaycandakı səfiri Julyen De Fraypont ilə idman edib. Bununla bağlı səfir Fraypont “X” hesabında fotolar paylaşıb.
“Bakı bulvarında səhər tezdən Baş nazir Aleksandr De Kro ilə qaçış”, - deyə səfir yazıb.
"Bakı mənim sevimli paytaxt şəhərimdir"
Bosniya və Herseqovinanın Rəyasət Heyətinin serbiyalı üzvü Jelka Tsviyanoviç rəsmi sosial şəbəkə hesabında Bakıdan paylaşım edib.
"Bakı mənim sevimli paytaxt şəhərlərimin “4 B” siyahısını tamamlayır. Banjaluka, Belqrad və Budapeşt ona yoldaşlıq edir. Yenidən burada olmaq çox xoşdur", - o qeyd edib.
