Sosial şəbəkələrdə Rusiyadakı həmvətənlərimizin müxtəlif şəkildə sıxışdırıldığı barədə məlumatlar yayılır. Eləcə də Rusiyanın miqrantlarla bağlı yeni qanunlarının azərbaycanlılara ciddi təsir edəcəyini düşünənlər də az deyil?
Son günlər iki ölkə arasında gərginləşən münasibətlər fonunda Rusiyadakı azərbaycanlılara təhdid varmı?
Miqrantlarla bağlı yeni qanunlar azərbaycanlılara necə təsir edəcək?
Moskva Azərbaycanlıları Milli-Mədəni Muxtariyyətinin sədri Bəxtiyar Həsənov Modern.az-a bildirib ki, hazırda azərbaycanlılara qarşı Rusiyada heç bir təhdid yoxdur:
“Telegram kanallarında, sosial şəbəkələrdə azərbaycanlılara qarşı hər hansı sərt addımların atılması ilə bağlı yayılan materiallar həqiqətə uyğun deyil. Mən bunu 100 faiz əminliklə deyirəm. Çünki Moskva Azərbaycanlıları Milli Mədəni Muxtariyyəti öz ətrafında dünya üzrə ən çox sayda azərbaycanlıları birləşdirir. Bizim "qaynar xətt"imizə konsultasiyalar, sənədləşmələrlə bağlı, hansı ki, aprel ayına qədər miqrantlara vaxt verilib, müraciətlər daxil olur. Amma azərbaycanlıların sıxışdırılması, onlara qarşı təhdidlərin yaradılması barədə hər şey yalandır. Biz öz diasporumuzla əlaqədəyik və sıx iş aparırıq. Kütləvi şəkildə klastrlarda, böyük ticarət mərkəzlərində yoxlamalar olsun, yaxud da metrostansiyalarda insanlar saxlanılsın - belə hallar baş vermir, bu barədə yayılan məlumatlar yalandır. Camaat öz işini görür. Hər kəs öz sahəsi üzrə sakitcə çalışır”.
Bəxtiyar Həsənov miqrantlarla bağlı Rusiyanın yeni addımlarının azərbaycanlılara heç bir təsir göstərməyəcəyini söyləyib:
“Heç bir sərtləşdirmə yoxdur. Hər dövlət öz qanunvericiliyini təkmilləşdirdiyi kimi, Rusiya dövləti də miqrasiya qanunlarını vaxtaşırı olaraq mükəmməlləşdirir. Burada ciddi nəsə yoxdur. Çünki ölkədə çox sayda qanunsuz miqrantlar var. Bu şəxslər sənədlərini qeydiyyatdan keçirməyiblər. Onlara aministiya verilib ki, tam azad şəkildə öz sənədlərini bərpa edib qanuna uyğun olaraq yaşasınlar. Düşünürəm ki, bu da maliyyə məsələləri ilə bağlıdır. Miqrantların hamısı patentlərinə görə ödəmələrini edib sakitcə işlərini görsünlər, ümumi qaydalardan yayınmasınlar. Bunun azərbaycanlılara heç bir mənfi təsiri yoxdur. Yüzlərlə insanla ünsiyyətdə oluruq. Hər biri qanuni şəkildə sənədlərini qeydiyyatdan keçirir və əmək fəaliyyətlərini davam etdirir. Yəni qanuna tabe olan vətəndaşlar həmişə sənədlərini qaydaya salırlar. O ki qaldı sənədləşmədən yayılanlara, onlar çox az saydadırlar. Mənə xəstə insanlarımızdan və sair problemləri olan həmyerlilərimizdən müraciətlər olur və biz onlar haqda müxtəlif qurumlara xahişlər edirik. Mən özüm bu yaxınlarda Azərbaycanın Rusiyadakı yenii səfiri Rəhman müəllimlə görüşdüm. Oradan çıxanda da gördüm ki, konsulluğun qarşısında çoxlu həmvətənlərimiz yığılıb. Bu onu göstərir ki, bizim vətəndaşlarımız öz sənədlərini səliqə-səhmana salmağa başlayıblar. Çoxları var ki, etibarlılıq müddəti başa çatmış pasportla buradadırlar. Onlar üçün şərait var ki, Azərbaycan səfirliyində pasportlarını yeniləsinlər. Səfirlik qarşısında buna görə də ajiotaj var”.
