Almaniya Prezidenti Frank-Valter Ştaynmayer ölkəmizdə səfərdədir. O, Şəhidlər xiyabanını ziyarət edib, Prezident İlham Əliyevlə görüşüb.
İlham Əliyev Almaniya şirkətlərinin bərpa olunan enerji sahəsində təcrübəsini qeyd edərək, bu istiqamətdə əməkdaşlığın genişləndirilməsinin vacibliyini bildirib. O, Ştaynmayerin səfərinin Azərbaycan-Almaniya əlaqələrini daha da möhkəmləndirəcəyinə əmin olduğunu vurğulayıb.
Almaniya Prezidenti isə Rusiya qazı ilə bağlı çətinliklər zamanı Azərbaycanın Avropaya verdiyi dəstəyə görə təşəkkür edib. O, Azərbaycanın sənaye və şərabçılıq sahələrində Almaniya ilə tarixi əməkdaşlığını xatırladıb və gənclərin Almaniyada təhsil almağa marağını müsbət dəyərləndirib.
Ekspertlər deyir ki, səfər bir çox aspektdən münasibətlərə müsbət təsir edəcək.
Modern.az-a açıqlamasında Almaniyanın Zaxhsen-Anhalt əyaləti üzrə Alman-Azərbaycan Cəmiyyətinin sədri Yaşar Niftəliyev bildirib ki, Almaniya Prezidentinin Azərbaycana səfərinin çox xeyirli və mahiyyətli olacağını düşünür:
"Bundan əvvəl Almaniya Prezidentinin Ermənistana səfər olmuşdu. Bu zaman edilən paylaşımda separatçıların bayrağının paylaşımda əks etdirilməsi kimi yanlış addımları izləyirdik. Əlbəttə, bu görüşün bizə necəsə köməyi olacağını düşünürəm. O da görüşlərin necə keçməsindən asılı olacaq".
Y.Niftəliyev söyləyib ki, bu səfərdən güclü istifadə edilməlidir:
"Bu səfərin Azərbaycan diasporunun fəaliyyətinə,əlbəttə, müsbət təsiri olacaq. Səfərdən istifadə edib Almaniya Azərbaycanlıları Alyansı yerli məmurlarla, hətta onun özü ilə görüş təşkil edə bilər. Bəzi məsələləri müzakirə etmək, Azərbaycan haqda təəssüratlarını öyrənmək olar. Bundan çox güclü istifadə etməliyik. Amma yenə də deyirəm ki, bu, Almaniya Prezidentinin hansı mühitdə görüşlər keçirməsindən, qayıtdıqdan sonra hansı təəssüratda olacağından asılıdır".
