Əfqanıstanda “Taliban” hərəkatının üzvləri tərəfindən avqustun 4-də girov götürülmüş Pakistana məxsus Mİ-17 helikopterinin heyət üzvləri azad edilib.
Modern.az-ın Rusiya KİV-nə istinadən verdiyi xəbərə görə, bu barədə Əfqanıstan Xarici İşlər Nazirliyinin rəsmi nümayəndəsi Nafiz Zakariya deyib.
O bildirib ki, 6 nəfərdən ibarət heyət bu gün Pakistana gətirilib.
Təhvilvermə Əfqanıstan-Pakistan sərhədində baş tutub. Bütün heyət üzvlərinin sağlam olduğu deyilir.
Xatırladaq ki, avqustun əvvəlində Pakistana məxsus Mi-17 helikopteri Əfqanıstan ərazisində qəza enişi edib.
Helikopterin göyərtəsində biri rus olmaqla 6 nəfər olub. Onlar “Taliban” hərəkatının üzvləri tərəfindən əsir götürülüblər.
Modern.az
