Türkiyənin daxili işlər naziri istefa verib.
Modern.az xəbər verir ki, Süleyman Soylu istefası barədə “Twitter” səhifəsində yazıb.
O, vəzifəsindən istefa verməsinin səbəblərini də açıqlayıb.
S.Soylu bildirib ki, həftəsonu ölkədə epidemiyanın qarşısının tamamilə alınması üçün komendant saatının tətbiq edilməsinin bütün məsuliyyəti ona aiddir:
"Hətta məhdud saatların əvvəlində qeydə alınan görüntülər (iğtişaşlar) mükəmməl idarə olunan bu prosesə uyğun gəlməyib. Bütün təcrübə və məsuliyyətlərimizi yaşadığımız bu tədbir belə görüntülərə səbəb olmamalı idi. Komendant saatı vicdanla, həftəsonu epidemiya və yoluxmanın dayandırılması üçün atılan bir addım idi. Heç vaxt zərər vermək istəmədiyim əziz millətim, ömrümün sonuna qədər sadiq qalacağım dövlət başçımız məni bağışlasın. Mən şərəflə icra etdiyim Daxili İşlər Nazirliyinin rəhbəri vəzifəsini tərk edirəm”.
Xatırladaq ki, komendant saatının tətbiq olunduğu - küçəyə çıxmağın yasaqlandığı 11 aprel tarixində -gecə saatlarında böyük təşviş yaranıb və insanlar ərzaq almaq üçün marketlərə axışıb. Mütəxəssislər həmin ərəfədə xəstəliyin daha çox yayıla biləcəyini elan ediblər.
11-12 tarixləri Türkiyənin 31 şəhərində komendant saatı elan edilmişdi - küçəyə çıxmaq tamamilə qadağan olunmuşdu.
