Amerikada 11 sentyabr terror aktlarının təşkilatçısı Xalid Şeyx Məhəmmədi edam gözləyir. Qərb mətbuatının məlumatına görə, ABŞ-ın Ədliyyə Nazirliyi Şeyx Məhəmmədin artıq öz cinayətini etiraf etdiyini bildirib. Ağ Evin mətbuat katibi Robert Gibs CNN televiziyasına verdiyi açıqlamada Nyu-York və Vaşinqtondakı terror aktlarında iştirakını etiraf etmiş Şeyx Məhmmədin ən yüksək cəzaya məhkum olunacağını deyib.
“Tezliklə Şeyx Məhəmməd məhkəmə önüünə çıxarılacaq və daha sonra isə son məkana yola salınacaq. 3 mindən artıq amerikalının ölümünə yol açmış dəhşətli cinayətə görə onu edam edəcəklər”,-deyə Gibbs bildirib.
Cinayət işinə Şeyx Məhəmmədin daha 4 əlaltısı cəlb olunub. Onlara qarşı məhkəmə prosesinin vaxtı bəlli deyil. Bundan əlavə, cinayət işinə mülki və ya hərbi tribunalda baxılması da məlum deyil. Barak Obama administrasiyası cinayət işinə Nyu-Yorkda baxılmasını planlaşdırır. Son vaxtlar cinayət işinə Nyu-Yorkda baxılması cəhdlərinə görə Ağ Evi tənqid edirlər. Şəhər meri Maykl Blümberq əvvəllər bu təklifi dəstəkləsə də, son günlər bunun əleyhinə çıxır. Mer qeyd edib ki, prosesin təhlükəsizliyini təmin etmək çox çətin olacaq, prosesin xərcləri isə milyard dollardan artıq təşkil edə bilər.
Xatırladaq ki, Şeyx Məhəmməd 11 sentyabr partlayışlarının təşkilatçısı olduğunu dəfələrlə etiraf edib. O, 2003-cü il martın 1-də Pakistanın Ravalpindi şəhərində “Əl-Qaida”düşərgəsində yaxalanıb.
