Kubanın keçmiş prezidenti Fidel Kastronun növbəti müddət üçün Karib dənizi ölkəsi parlamentinə namizədliyi göstərilib.
Modern.az Press TV-yə istinadən bildirir ki, bu barədə Kuba dövlət qəzeti xəbər verib. Kuba inqilabının lideri Fidel Kastro Santiaqo de Kuba bələdiyyəsi nümayəndələrinin Milli Məclis üçün təklif etdiyi 25 namizədin siyahısına rəhbərlik edir. 86 yaşlı Kastro 2008-ci ildə prezidentlikdən istefaya çıxmasından bu yana Milli Məclisin üzvüdür.
Kubanın hazırkı prezidenti və keçmiş liderin qardaşı Raul Kastronun da 612 nəfərlik parlamentə namizədliyi göstərilib. Prezidentin parlamentə üzv göstərilməsi onun 2013-cü ildə başlayacaq beş illik müddətdə yenidən prezident seçilməsinin ilk prosedural addımı hesab edilir.
