Rusiyanın ən varlı iş adamlarının sərvəti 2022-ci ilin əvvəlindən 45,484 milyard dollar azalıb.
Modern.az xəbər verir ki, bu barədə "Bloomberg" agentliyinin Milyarderlər İndeksində (BBI) qeyd olunub.
Bu indeks dünyanın ən zəngin 500 adamını əhatə edir. Onlardan 23-ü milliyətcə rusdur.
Mayın 2-nə olan məlumata görə, rusiyalı biznesmenlərin ümumilikdə cəmi 328,04 milyard dollar sərvəti var.
Rusların ən zəngini "NorNikel" mədən və əritmə şirkətinin baş direktoru Vladimir Potanindir. 2022-ci il yanvarın 1-dən onun sərvəti 645 milyon dollar artıb. Hazırda varidatı 31,5 milyard dollar dəyərində qiymətləndirilir.
İkinci yerdə “Novatek” neft-qaz şirkətinin direktorlar şurasının sədri Leonid Mixelson qərarlaşıb. O, 6,48 milyard dollar itirib. Hazırda iş adamı 26 milyard dollara sahibdir.
Üçüncü sırada "Novolipetsk" dəmir-polad xavodunun sahibi Vladimir Lisin gəlir. O, müvafiq dövr ərzində 4,27 milyard dollar itirsə də, bir pillə irəliləyib. İş adamının sərəncamında 23,7 milyard dollar vəsait var.
Akif İsmayılov
