“Əl-Qaidə” terror təşkilatının rəhbəri Ayman əl-Zəvahiri və ailəsinin Kabildə gizləndiyi müəyyən edilib. Bundan sonra pilotsuz uçuş aparatı ilə ona qarşı əməliyyat keçirilib.
Modern.az xəbər verir ki, bu barədə ABŞ Prezidenti Co Bayden “Əl-Qaidə” liderinin ölümü ilə bağlı açıqlamasında bildirib.
Bayden Zəvahiriyə qarşı əməliyyatla ədalətin bərqərar olduğunu, bununla 11 sentyabr 2001-ci il tarixində törədilmiş terror aktında həyatını itirənlərin ailələrinə təskinlik verildiyini söyləyib.
Bayden uğurlu əməliyyata görə kəşfiyyata təşəkkür edib: “Əgər xalqımız üçün təhdidsinizsə, ABŞ sizi tapacaq. Bu uğurlu əməliyyatdakı qeyri-adi əzmkarlıq və bacarıqlarına görə ABŞ kəşfiyyat bölmələrinə təşəkkür edirəm”.
Qeyd edək ki, ABŞ-ın Əfqanıstanda keçirdiyi antiterror əməliyyatı nəticəsində “Əl-Qaidə” terror təşkilatının rəhbəri Ayman əl-Zəvahiri öldürülüb. Məlumata görə, ABŞ kəşfiyyatı tərəfindən Ayman əl-Zəvahirin yeri ilin əvvəlində müəyyən edilib. Aylarla onun hərəkətləri izlənilib və ailəsi ilə birlikdə Kabildə təhlükəsiz evdə yaşadığı üzə çıxıb.
71 yaşlı Əl-Zəvahiri Usamə bin Ladendən sonra “Əl-Qaidə”yə rəhbərlik edirdi. O, ABŞ-da törədilən 11 sentyabr terror aktının təşkilatçısı kimi tanınırdı.
