Türkiyə Ermənistanla münasibətlərin normallaşdırılması prosesi çərçivəsində növbəti görüşün üçüncü ölkədə keçirilməsini istəmir.
Modern.az xarici KİV-ə istinadən xəbər verir ki, bu barədə Türkiyə XİN-dəki mənbə bildirib.
Qeyd edilib ki, rəsmi Ankara görüşün Türkiyə və ya Ermənistanda keçirlməsinin tərəfdarıdır.
Xatırladaq ki, 2021-ci ilin dekabrında İrəvan və Ankara dialoqa başlamaq üçün öz diplomatlarını təyin ediblər. Bunlar Ermənistan tərəfdən parlamentin vitse-spikeri Ruben Rubinyan, Türkiyə tərəfdən isə ABŞ-dakı keçmiş səfir Serdar Kılıçdır.
Onlar bu il yanvarın 14-də Moskvada və daha sonra üç dəfə Vyanada görüşüblər.
Ermənistanla Türkiyə arasında diplomatik əlaqələr yoxdur, sərhəd 1993-cü ildən Ankaranın təşəbbüsü ilə bağlıdır. Ölkələr arasında münasibətlərin çətinləşməsinə bir sıra hallar, xüsusən də Ankaranın Qarabağ problemində Azərbaycanın mövqeyini dəstəkləməsi səbəb olub.
