Müharibə başlayan günü mən Ermənistanda deyildim.
Modern.az xəbər verir ki, bunu Ermənistanın keçmiş müdafiə naziri David Tonoyan 44 günlük Qarabağ müharibəsini araşdıran parlament komissiyasının iclasında deyib.
O, sentyabrın 25-də, yəni müharibədən 2 gün əvvəl təlim məqsədilə ölkəni tərk etdiyini bildirib.
“25 sentyabr 2020-ci ildə Rusiya Federasiyasına hərbi təlimlərə göndərildim. Sentyabrın 25-dən 26-na keçən gecə silah və hərbi texnikanın tədarükünü təşkil etmək məqsədilə işgüzar səfər çərçivəsində Avropa İttifaqı və NATO üzvü olan ölkədə oldum. Ayın 26-sı axşam, müharibə başlamazdan əvvəl mən təyyarədə idim, Qazaxıstana ezamiyyətimi davam etdirirdim. Orada danışıqlar aparılmalı idi. Silah və hərbi texnikanın alınması davam etdirilməli idi”, - keçmiş müdafiə naziri bildirib.
Tonoyan müharibə başladıqdan bir gün sonra İrəvana qayıtdığını vurğulayıb:
“Ayın 27-si səhər saatlarında Baş Qərargah rəisi telefonla mənə məlumat verdi. Bundan sonra baş nazirlə söhbətim oldu. Koronavirusun pis vəziyyətini nəzərə alaraq, iki-üç saat ərzində güclə təyyarə tapdıq və Ermənistana qayıda bildim. Qayıdışım maneələrlə oldu, amma bu barədə qapalı iclasda danışacağam. Mən Gürcüstan vasitəsilə qayıtdım. Sentyabrın 28-i səhər saat 4-də İrəvanda idim”.