Ermənistanın baş naziri Nikol Paşinyanın Rusiyadan silah almaq üçün İrəvanın pul ödədiyi, lakin heç vaxt ala bilmədiyi barədə dəfələrlə səsləndirdiyi fikirlərin həqiqəti əks etdirmədiyi barədə məlumat yayılıb.

 

Modern.az xəbər verir ki, bu barədə "Joğovurd" qəzeti mənbələrinə istinadən yazıb.

 

Qeyd olunub ki, Ermənistan Müdafiə Nazirliyi ilə Rusiyanın “Smerç” tipli raketlər istehsal edən “NPO Splav” zavodu arasında müqavilə bağlanıb. Ermənistan üçün lazım olan raketlərin istehsalı ilə bağlı pul alınıb. Zavod sövdələşmənin üzərinə düşən hissəsini yerinə yetirib və Ermənistan Müdafiə Nazirliyinə malları çatdırmağa hazır olduğunu, qəbul üçün İrəvandan mütəxəssislərin göndərilə biləcəyini bildirib.

 

Qəzet iddia edir ki, 1 il 3 ay keçməsinə baxmayaraq, Ermənistan tərəfi hələ də heç kimi göndərməyib. Zavod daha sonra 3 dəfə Ermənistan Müdafiə Nazirliyi ilə əlaqə saxlayıb ki, bu ölçüdə və xassələrə malik olan məhsulları fabrikin anbarlarında saxlamaq problemli olduğundan, tez bir zamanda malları almaq üçün gəlsinlər

 

Mənbə bildirib ki, Ermənistan Müdafiə Nazirliyi isə heç vaxt öz nümayəndələrini göndərməyib. Daha sonra Rusiya bu raketləri Ukraynadakı müharibədə istifadə etməyə başlayıb. Bununla belə, Ermənistan-Rusiya mehriban münasibətlərini nəzərə alaraq, Moskva yenə də İrəvana sözügedən hərbi məhsulları tədarük etməyə hazır olduğunu çatdırıb. 2020-ci ildən sonra Rusiya Ermənistana 1,4 milyard dollar dəyərində silah və sursatları 20 il ödəmə müddəti ilə kreditlə tədarük etməyi təklif edib.

 

Nəşr yazıb ki, 400 milyon dollarlıq ilk müqavilə artıq təsdiq edilibmiş və imzalanmağa hazır olub, lakin gözlənilmədən Ermənistan bu müqavilələrdən imtina edib. Əvəzində İrəvan Hindistanın özəl şirkətləri ilə müqavilələr bağlayıb və dərhal 500 milyon dollar avans köçürüb. Bu malların heç 5 faizi də tədarük edilməyib.

 

Qəzetin yazdığına görə, Hindistandan alış 3 dəfə baha başa gəlib. “Joğovurd” şərh almaq üçün Ermənistan Müdafiə Nazirliyinə müraciət edib, nazirlik yazılı sorğu göndərməyi xahiş edib.