İsrailin hərbi kabineti Misirin Fələstin-İsrail münaqişəsinə dair təklif etdiyi sülh planını müzakirə etmək üçün görüşməyi planlaşdırır.
Modern.az xəbər verir ki, bu barədə “The Wall Street Journal” (WSJ) İsrail rəsmilərinə istinadən məlumat yayıb.
Məlumata görə, Misirin təklif etdiyi planın bəzi müddəaları, o cümlədən HƏMAS hərəkatının nümayəndələrinin Qəzza zolağının keçid hökumətinə daxil edilməsi Təl-Əviv üçün qəbuledilməzdir. Qəzet Qəzzada girovların azad edilməsi üçün danışıqlarda İsrail tərəfindən iştirak edən Gerşon Baskindən sitat gətirir: “Bu razılaşma HƏMAS-ın qələbəsi kimi görünür və israillilərin bununla razılaşacağını təsəvvür etmək mənim üçün çox çətindir”.
Daha əvvəl “Reuters” xəbər vermişdi ki, Misir Qəzza zolağında radikallar tərəfindən saxlanılan çoxlu sayda girovun azad edilməsi müqabilində atəşkəsi nəzərdə tutan nizamlanma variantını təklif edib. Bu addım münaqişə tərəfləri arasında daha geniş sazişin bağlanmasına töhfə verməlidir. Bundan əlavə, hazırda HƏMAS-ın nəzarətində olan anklavın rəhbərliyinin dəyişdirilməsinə gətirib çıxarmalıdır. Eyni zamanda, Qahirə Qəzzada seçkilərin keçirilməsinə, HƏMAS tərəfdarlarının təqib olunmayacağına və ya məhkəmə qarşısına çıxarılmayacağına zəmanət verməyi təklif edib.