Britaniya polisi 70 mindən çox insanın on milyonlarla funt sterlinqini dələduzluq yolu ilə ələ keçirən dəstənin üzvlərini həbs edib.

Modern.az xəbər verir ki, dəstə üzvləri 170-ə yaxın populyar brendin, bank və ictimai qurumların saxta veb-saytlarını yaradaraq insanların elektron poçt ünvanlarını, parol və maliyyə məlumatlarını oğurlayıblar.

Polislər bu həftə dəstə liderinin və onun dörd əsas üzvünün evlərinə basqın ediblər. Qeyd olunur ki, həmin şəxslər ayda 200-300 funt-sterlinq qarşılığında 2000 cinayətkara saxta veb-saytlar almaq və qurmaqda dəstək göstərib.

Britaniya polisi dələduzları yaxalamaq üçün dünya üzrə 17 digər hüquq-mühafizə orqanı ilə birgə ikiillik əməliyyat keçirib. Britaniyada 37 şübhəli həbs edilib və xaricdəki 70 mülkdə axtarış aparılıb.

Polisin hesablamalarına görə, dələduzlar “Lab Host” veb-saytı vasitəsilə 40 min saxta sayt yaradıb və 480 min kart nömrəsi, 64 min PİN nömrə və onlayn xidmətlər üçün bir milyon parol oğurlayıblar. Bu, təkcə Böyük Britaniyada 70 min zərərçəkənin olduğu mənasına gəlir.