Avropa İttifaqının liderləri bu axşam Brüsseldə özəl şam yeməyində Ursula fon der Leyenin ikinci beş illik müddətə Avropa Komissiyasının rəhbəri vəzifəsinə namizədliyini təsdiq etməyi planlaşdırır.

Modern.az xəbər verir ki, bu barədə “Financial Times” öz mənbələrinə istinadən yazır.

Məlumata görə, üzv dövlətlərin liderləri alyansın digər əsas mövqelərini də müzakirə edəcəklər.

Avropa İttifaqının (Aİ) yüksək rütbəli diplomatı Ursula fon der Leyenin Avropa Komissiyasının rəhbəri vəzifəsinə namizədliyinə istinad edərək, "Heç kim başqa nəticəni müzakirə etmir" deyib.

Həmçinin qeyd olunur ki, bugünkü şam yeməyində Aİ Şurasının prezidenti, eləcə də blokun ali nümayəndəsi, baş diplomatı kimi kimin seçiləcəyi müzakirə olunacaq.
Portuqaliyanın keçmiş baş naziri Antonio Kosta Şarl Mişeldən sonra Aİ Şurasının prezidenti postuna ilk namizəddir. İkinci əsas namizəd Estoniyanın baş naziri Kaya Kallasdır.

Bununla belə, nəşrin mənbələri xəbərdarlıq edib ki, görüş ərəfəsində variantlardan heç biri Ursula fon der Leyenin Avropa Komissiyasına rəhbərlik etmək seçimi qədər aydın deyil.