Bu gün Amerika Birləşmiş Ştatlarında prezident seçkiləri keçirilir. "Exit-pollar"a görə, Respublikaçıların namizədi Donald Trampla Demokratların namizədi Kamala Harris arasında fərq olduqca azdır. 

“Reuters-Ipsos”un keçirdiyi son sorğuya əsasən, Harrisin reytinqi 44, Donald Tramın reytinqi 43 faizdir. Qeyd olunur ki, daha əvvəl 16-21 oktyabr tarixlərində keçirilmiş sorğudakı fərq 2 faiz təşkil edib. Həmçinin yeni sorğu göstərir ki, Tramp bir neçə mövzularda Harris üzərində üstünlük əldə edir. Bu baxımdan iqtisadiyyat mövzusunda Trampın üstünlüyü 10 faiz, miqrasiya mövzusunda isə 15 faiz olub.
 

Bəs hansı namizədin seçilməsi Cənubi Qafqaza nələr vəd edir?
 

Məsələ ilə bağlı Modern.az-a danışan Milli Məclisin Beynəlxalq münasibətlər və parlamentlərarası ittifaq komitəsini üzvü Elçin Mirzəbəyli söyləyib ki, seçkilərin nəticələrini öncədən proqnozlaşdırmaq çox çətindir.

"Ölkə faktiki olaraq, həm də kifayət qədər sərt şəkildə qütbləşib və bu qütbləşmə, təkcə siyasi müstəvidə deyil. Bu baxımdan, seçkilər həm də Birləşmiş Ştatların gələcəyi, unitarlığı baxımından, mühüm əhəmiyyətə malikdir.
Respublikaçıların namizədi qalib gələcəyi təqdirdə həm daxili, həm də qlobal miqyasdakı qütbləşmənin indiki qədər dərinləşməyəcəyi, prosesin qismən də olsa sabitləşəcəyi, ən azı bunun proqnozlaşdırılmasının mümkün olacağını düşünürəm. 

Harrisin qələbəsinin isə onun Baydenin xarici siyasət kursunu davam etdirməyəcəyi barədə bütün iddialarına baxmayaraq, qlobal ziddiyyətləri daha da dərinləşdirəcəyi, hətta geriyə dönüşü olmayan bir məcraya yönəldəcəyi qənaətindəyəm. Harrisin nə fərdi baxış bucağı, nə də bir siyasətçi olaraq obrazı barışdırıcıdır. Bayden adminstarsiyasındakı rolu namizəd olanadək nəzərə çarpmayan bu siyasətçinin, həm də prezident seçiləcəyi təqdirdə daha çox özünütəsdiqə can atacağını düşünürüəm ki, bu da ABŞ daxilindəki ziddiyyətləri dərinləşdirəcək". 

Deputat vurğulayıb ki, kimin seçilməsindən asılı olmayaraq, siyasi anlamda Ağ evin maraqları ilə bağlı dəyişikliyin baş verəcəyi gözlənilmir:
 

"Mahiyyət etibarilə kimin seçilməsindən asılı olmayaraq, ABŞ-ın yeni prezidenti ölkəsinin dünyadakı hegemon rolunun qorunmasına çalışacaq. Fərq yalnız bunu kimin necə edəcəyi ilə bağlıdır və mənim baxış bucağıma görə, Harris seçilərsə, proses daha ağrılı ola bilər. İlk növbədə Birləşmiş Ştatların özü üçün…
Seçkinin nəticələrinin Cənubi Qafqaza təsirinə gəldikdə isə qənaətimə görə, hazırda söhbət iki pisdən daha az ziyansızın, yaxud az dağıdıcının seçilməsindən gedir. Siyasi anlamda isə Ağ evin maraqları ilə bağlı dəyişikliyin baş verəcəyi gözlənilmir".