Çində məşhur jurnalist casusluq ittihamı ilə həbs edilib.
Modern.az bu barədə "Reuters" agentliyinə istinadən xəbər verir.
Pekin məhkəməsi jurnalist Dong Yuyuya 7 il həbs cəzası verib. O, Çin Kommunist Partiyasına bağlı "Guangming Daily" qəzetində şöbə redaktorunun müavini vəzifəsində çalışıb.
Jurnalist 2022-ci ildə yapon diplomat ilə nahar edərkən həbs edilib. Yaponiyalının bir neçə saat saxlanması Yaponiya Xarici İşlər Nazirliyinin etirazına səbəb olub. Dong Yuyunun ailəsinin dediyinə görə, hökmdə jurnalistin görüşdüyü iki yapon diplomat “casus təşkilatının agentləri” adlandırılır. Bildirilir ki, Donq Yuyu mütəmadi olaraq xarici diplomatlar və jurnalistlərlə görüşür.
Dong Yuyu 1987-ci ildən "Guangming Daily"də işləyir. Qərb mediasının yazdığına görə, o, öz köşə yazılarında Çin rəhbərliyini birbaşa tənqid etmədən mötədil islahatların tərəfdarı olub. Jurnalist 2007-ci ildə Harvard Universitetində Nieman Təqaüdü alıb və daha sonra Yaponiya universitetlərində qonaq müəllim kimi işləyib.
