İran prezidenti Məsud Pezeşkian İraqın baş naziri Məhəmməd Şiad Əl-Sudani ilə telefon danışığında ölkəsinin Suriyadakı silahlı qruplaşmaların hücumlarına qarşı mübarizədə əməkdaşlığa hazır olduğunu bildirib.

Modern.az xəbər verir ki, “Mehr” agentliyinin məlumatına görə, bazar günü Məhəmməd Şiad Əl-Sudani ilə telefon danışığı zamanı Məsud Pezeşkian deyib: “İran bu terror hücumlarına qarşı mübarizədə istənilən əməkdaşlığa hazırdır”.

Pezeşkian Suriyanın ərazi bütövlüyünün qorunub saxlanmasının İran İslam Respublikasının regional strategiyası olduğunu vurğulayaraq əlavə edib: “Livanda atəşkəsdən sonra region nisbi sülhə doğru irəliləyir və diqqət Qəzzaya yönəlir. Suriyada baş verən son hadisələr regional təhlükəsizliklə bağlı ciddi narahatlıqları artırıb”.

Pezeçkian deyib ki, Suriyadakı bu hadisələr İsrailin islam ölkələri daxilində qeyri-sabitliyi, parçalanmanı və qarşıdurmanı artırmaq üçün pis niyyətli planlarının bir hissəsidir ki, bu da müsəlmanların terrorizmin yayılmasının qarşısını almaq üçün birləşmə və birgə səylər göstərməsi zərurətinə səbəb olub”.

İraqın baş naziri də öz növbəsində Suriyanın şimalında qeyri-müəyyən vəziyyətin yaranmasından narahatlığını bildirib, terrorçu qrupların son hərəkətlərini Suriyanın suverenliyi və ərazi bütövlüyünü pozmaq cəhdi kimi qiymətləndirib.