ABŞ Konqresinin alt komitəsinin araşdırması nəticəsində müəyyən edilib ki, COVID-19 virusu Çinin Uhan şəhərindəki laboratoriyada yaranıb.

Modern.az xəbər verir ki, bu barədə 520 səhifəlik hesabatın hazırlanması 2 il çəkib. Laboratoriya mənşəli nəzəriyyəni dəstəkləyən hesabatda deyilir ki, alt komitə virusun təbiətdə rast gəlinməyən bioloji xüsusiyyətlərə malik olduğuna inanır.

"Demək olar ki, hər hansı bir elmi standarta görə, təbii mənşəli sübutlar mövcud olsaydı, bu, artıq ortaya çıxacaqdı", - hesabatda bildirilib.

Qeyd edilib ki, Uhanda SARS (ağır kəskin respirator sindrom) ilə mübarizə üçün Çinin aparıcı tədqiqat laboratoriyası yerləşir. Bundan əlavə, qeyd olunur ki, laboratoriya tədqiqatçıları SARS-CoV-2-yə bənzər virusa 2019-cu ilin payızında, virusun qida bazarında aşkarlanmasından bir neçə ay əvvəl, koronavirus pandemiyasının başlanğıcında yoluxublar. Virusun mənşəyi ət, balıq və ekzotik heyvanların sanitar şərait olmadan satıldığı Çin bazarları ilə bağlı olub.

Koronavirus statistikasını da izləyən Vorldometers-in məlumatına görə, xəstəlik indiyədək 7 milyondan çox insanın ölümünə səbəb olub.