Rusiya Silahlı Qüvvələrinin Baş Qərargah rəisi Valeri Gerasimov və ABŞ Silahlı Qüvvələrinin Baş Qərargah Rəislərinin (BQR) sədri Çarlz Braun telefon danışığı aparıb.
Modern.az xəbər verir ki, məlumatı ABŞ tərəfi yayıb.
Telefon danışığında Ukrayna münaqişəsi də daxil olmaqla bir sıra təhlükəsizlik məsələləri müzakirə edilib.
BQR sözçüsü Ceril Dorsinim sözlərinə görə, danışıqlar noyabrın 27-də, Rusiyanın orta mənzilli “Oreşnik” ballistik raketindən istifadə etdikdən 6 gün sonra baş tutub.
Ceril Dorsi əlavə edib ki, bu, Braunun vəzifəyə gəlməsindən sonra generallar arasında ilk telefon danışığıdır. Tərəflər beynəlxalq və regional gündəliyi müzakirə ediblər. "General Gerasimovun xahişi ilə, general Braun söhbəti əvvəlcədən açıqlamamağa razılaşdı", - o qeyd edib .
Amerika mətbuatının istinad etdiyi rəsmilərə görə, Gerasimov söhbətində Brauna deyib ki, “Oreşnik” ballistik raketinin buraxılması ABŞ prezidenti Co Baydenin Ukraynaya ATACMS sistemlərindən istifadə etməyə razılıq verməsindən xeyli əvvəl planlaşdırılıb.
Mətbuat yazır ki, Valeri Gerasimov və Çarlz Braun Ukrayna ilə bağlı ölkələr arasında yanlış hesablamaların və gərginliyin qarşısını almaq yollarını müzakirə ediblər.
