2022-ci ilin fevral ayında başlayan genişmiqyaslı müharibədə Ukrayna 43 min hərbçisini itirib.
Modern.az-ın xəbərinə görə, bu barədə Ukrayna Prezidenti Volodimir Zelenski məlumat verib.
O bildirib ki, Ukrayna ordusunun 370 min nəfər hərbçisi yaralanıb. Zelenski sosial media hesabındakı paylaşımında yaralıların təxminən 50 faizinin xidmətə qayıtdığını bəyan edib.
Zelenskinin sözlərinə görə, Rusiya müharibə dövründə ümumilikdə 750 min hərbçi itirib, onların 198 mini ölüb, 550 mindən çoxu yaralanıb.
Qeyd edək ki, Zelenskinin bu açıqlamasından bir müddət əvvəl ABŞ-ın yeni seçilmiş prezidenti Donald Tramp Ukraynanın döyüş meydanında 400 min əsgər itirdiyini yazıb. O, ölən və yaralanan rusların sayının 600 min nəfər olduğunu bildirib.
Tramp Zelenski ilə şənbə günü görüşüb. Parisdəki görüşdən sonra Tramp Ukraynada sülh danışıqlarının mümkün qədər tez başlamasına çağırıb. Zelenski görüşün “yaxşı” olduğunu deyib.
"Biz Ukraynadakı döyüş meydanında və qlobal vəziyyətdə - cəbhəmizdən tutmuş Şimali Koreyaya qədər vacib məsələləri müzakirə etdik", - Ukrayna prezidenti yazıb.
