Bir sıra Qərb ölkələri Ukraynaya qoşun göndərilməsi ilə bağlı müzakirələr aparır. Məlumatı Qərb mediası yayıb.
Modern.az-a danışan politoloq Natiq Miri bildirib ki, göndərilməsi ehtimal olunan qoşunlar Ukraynada Rusiyaya qarşı döyüşmək üçün nəzərdə tutulmayıb:
"Sadəcə atəşkəs təmin olunub, konkret sülhlə bağlı razılıq əldə olunarsa,həmin qoşunun ayırıcı xəttə təmin olunması planlaşdırılıb. Bu məsələdə də Aİ ölkələri arasında fikir ayrılıqları var. Slovakiya və Macarıstan kimi ölkələr bunun əleyhinə çıxır. Fransa, İtaliya və digər aparıcı Avropa İttifaqı ölkələri fikir birliyi nümayiş etdirirlər. Ancaq bu məsələ barədə danışmaq hələ tezdir. Son Avropa Birliyi xarici işlər nazirlərinin toplantısında bu məsələ yenidən gündəmə gətirildi. Bunu gündəmə gətirən Fransa Prezidenti Emmanuel Makron olub. Avropanın xarici işlər üzrə nümayəndəsi, yəni Avropa diplomatiyasının rəhbəri Kaye Karlas vaxtından tez addım olacağını iddia edirdi. Düşünürəm ki, bu, doğru fikirdir. Çünki bu addım arx gəlməmiş çırmanmağa bənzəyərdi. Düşünürəm ki, bu addım Rusiyaya qarşı mesaj xarakteri daşıyırdı ki, hələ də Avropa Rusiyaya qarşı Ukrayanın yanındadırlar. Ola bilsin ki, Makronun niyyəti bu idi. Hər bir halda ortada atəşkəs, sülh analaşması olmadan bu barədə danışmaq, hansısa hazırlıq görmək indiki məqamda tezdir. Donald Tramp inaqurasiyadan sonra bu məsələylə məşğul olub konkret nəticə əldə edərsə,Avropa dövlətləri bu məsələni müzakirə edə bilər. Doğrudur ki, Avropa İttifaqında qərarların hər biri konsensusla verilir. Lakin bu məsələdə Slovakiya və Macarıstan istəməsə belə Avropa Birliyi ölkələri ayrı-ayrılıqda razılıq əldə edərək təhlükəsizlik qoşunlarını Ukraynya göndərə bilər. Sadəcə zamanı deyil".
N.Miri Rusiya-Ukrayna məsələsinin bir gündə dayanadırılacaq məsələ olmadığını vurğulayıb:
"Rusiya-Ukrayna müharibəsi olduqca mürəkkəb və müxtəlif geosiyasi maraqları özündə ehtiva edən münaqişədir. Bu münaqişə nəticə etibarilə dünyanın yenidən formalaşması prosesinə rəvac verə bilər. Burada kimin qazanıb-qazanmyacağı məsələsini də nəzərə alsaq, müharibənin bitməsi daha da mürəkkəbləşdirir. Ona görə müharibə bir müddət də davam edəcək. Trampın seçki kampaniyasında dedikləri isə sadəcə təbliğat-təşviqat zamanı söylənilmiş sözlərdir. Donald Tramp Yaxın Şərqdə fələstinliləri, Həması da hədələyir ki, yanvarın 20-nə qədər bütün girovlar qaytarılmayacağı təqdirdə guya onlara cəhənnəmi yaşadacaq. Ümumiyyətlə, bu fikir də absurddur. Çünki artıq 1 ildən artıqdır ki, fələstinlilər cəhənnəmi yaşayır. Üstəlik Qəzzada daş üstündə daş qalmayıb ki, bundan sonra atılacaq dağıdıcı raketlərlə yenidən cəhənnəmi yaşatsınlar. Dağılacaq bir şey qalmayıb. Ona görə də kimi kimlə və nə ilə qorxudurlar?".
