“ABŞ-ın milli borcunun artması fonunda Vaşinqton Avropanın təhlükəsizliyinə həddən artıq çox pul xərcləyir”.
Modern.az xəbər verir ki, bunu məşhur iş adamı və milyarder İlon Mask sosial şəbəkədəki səhifəsində yazıb.
“Xüsusilə də böyük büdcə kəsirimiz və borcun qəbuledilməz həddə artması zamanı bunun heç bir mənası yoxdur”, - Mask vurğulayıb. SpaceX və Tesla-nın qurucusu Amerika vergi ödəyicilərinin Şimali Atlantika Alyansının (NATO) ümumi xərclərinin 25 faizini qarşıladıqlarına diqqət çəkib.
İlon Maskın bu açıqlaması NATO üzvü olan ölkələrdə təşviş yaradıb. Qeyd edək ki. İlon Mask ABŞ-ın yeni seçilmiş prezidenti Donald Trampın komandasında yer alacaq.
“Financial Times” qəzeti yazıb ki, Donald Trampın komandası avropalı rəsmilərə bəyan edib ki, yeni Amerika administrasiyası NATO üzvü olan ölkələrdən hərbi ayırmaları ÜDM-nin 5 faizinə çatdırmağı tələb edəcək. Eyni zamanda, onlar həmçinin qeyd ediblər ki, ABŞ Avropaya eyni hərbi ayırmaları davam etdirsə, daha əlverişli ticarət şərtləri əldə etməlidir.
