İran tərəfi 2020-ci ildə 44 günlük müharibədən əvvəl Ermənistanı savaş ola biləsəyi barədə xəbərdar edib.

Modern.az xəbər verir ki, bunu İranın nüfuzlu strateqi Fərşad Adel Tehranda bir neçə erməni jurnalistlə görüşündə deyib.

"Bəli, bu doğrudur. İranlı hərbi ekspertlər müharibədən xəbərdar idilər və bu məlumatı həm İranın, həm də Ermənistanın hərbi elitasına ötürdülər", - o deyib.

Fərşad Adelin sözlərinə görə, İranın 2020-ci ildəki xarici siyasəti ilə indiki xarici siyasəti fərqlidir. O zaman İran əmin idi ki, Azərbaycan beynəlxalq hüquq çərçivəsində ona məxsus olan əraziləri geri alır, indi isə İran yeni hərbi təcavüzə dözməyəcəyini açıq şəkildə bəyan edir.

“Ali lider Xamenei Türkiyə prezidenti Ərdoğanla bu barədə danışdı, bizim təhlükəsizliyimizlə bağlı məsələ bizim üçün sarsılmazdır, biz sözümüzə əməl edirik, lakin bu o demək deyil ki, erməni tərəfdaşlarımız tamamilə bizə güvənməlidir.
Düşünürəm ki, hər hansı bir ölkəni, xüsusən də bizimlə dost olan Ermənistanı həddən artıq arxayın etməyimiz düzgün deyil. Amma biz öz təhlükəsizliyimizlə bağlı problemə biganə qalmayacağıq”, deyə iranlı strateq bildirib.

Fərşad Adel bildirib ki, Zəngəzur bölgəsi İranın Qara dənizə yeganə çıxış yolu olduğundan Tehran  bu barədə açıq şəkildə xəbərdarlıq edib.