Bir müddət öncə Ermənistanın hakim “Mülki müqavilə” partiyasından xaric edilən deputat Ovik Ağazaryan partiya yaratdığını elan edib.
Modern.az-ın məlumatına görə, bu barədə o, sosial şəbəkədə bildirib.
“Təşəbbüs qrupu adından bəyan etmək səlahiyyətinə malikəm ki, Ermənistan qanunvericiliyi ilə müəyyən edilmiş qaydada partiyanın yaradılması prosesinə başlayırıq”, - Ağazaryan yazıb.
Deputatın sözlərinə görə, yeni siyasi təşkilat “Vahid Milli Sosialist Partiyası” adlanacaq. Partiyanın təsis yığıncağının vaxtı və yeri 2025-ci il yanvarın 3-də açıqlanacaq.
Xatırladaq ki, oktyabrın sonunda parlamentdə Ağazaryanla İstintaq Komitəsinin rəhbəri Arqişti Kyaramyan arasında söz davası baş verib və az qala davaya çatıb. Bundan az sonra Kyaramyan vəzifəsindən azad edilib. Mübahisəyə qatılan deputat Narek Zeynalyan da istefa verib. Ağazaryan bundan imtina edib. O, “Mülki müqavilə”dən çıxarılandan sonra müstəqil deputat olub.
Öz növbəsində baş nazir Nikol Paşinyan bildirib ki, qanunda nəzərdə tutulmuş bütün mexanizmlərdən istifadə etməklə Ağazaryanı deputat mandatından məhrum etmək lazımdır.
Hökumət başçısının sözlərinə görə, Ağazaryan dövlət təhlükəsizliyi və əks-kəşfiyyatla bağlı məlumatların ötürülməsində iştirak edib. Korrupsiyaya Qarşı Mübarizə Komitəsindən “Sputnik Ermənistan”a verilən məlumata görə, onun barəsində Cinayət Məcəlləsinin 427-ci (dövlət sirrini ehtiva edən məlumatların dərc edilməsi) maddəsi ilə cinayət işi başlanıb.
