Tbilisidə hökumət əleyhdarları parlament binası qarşısında yeni il süfrəsi açıblar.
Modern.az Gürcüstan mətbuatına istinadən xəbər verir ki, Yeni il şənliyində ölkənin keçmiş prezidenti Salomu Zurabişvili də iştirak edib.
Rustaveli prospektində yemək və içkilərdən ibarət uzun bir masa qurulub. Stolun yanında etirazçılar mahnı oxuyub, rəqs edib və tostlar deyiblər.
Yerli “Newsgeorgia” portalı Salome Zurabişvilinin izdiham arasında etirazçılarla söhbətinin videosunu dərc edib.
“Yeni il ərəfəsində tamamilə alkoqolsuz etiraz aksiyası keçirmək cəhdi, əlbəttə ki, uğursuzluğa düçar oldu. Güclü spirtli içkilər yoxdur, lakin gürcü şərabı olmadan Yeni ili qeyd etmək mümkün deyildi”, – “Newsgeorgia” yazır.
Xatırladaq ki, Gürcüstanda bir aydan çoxdur ki, hökumət əleyhinə kütləvi etirazlar davam edir. Gürcüstanda mitinqlərin yeni dalğası hakim “Gürcü Arzusu” partiyasının Avropa İttifaqına daxil olmaq üzrə danışıqların başlanmasını 2028-ci ilə qədər dayandırmaq qərarına görə başlayıb. Dekabrın 29-da Gürcüstanın yeni prezidenti Mixeil Kavelaşvilinin andiçmə mərasimi olub. Mərasimdə o, Avropa İttifaqına daxil olmaq üzrə danışıqlar prosesinə başlamağa hazır olduğunu bəyan edib.
