Şimali Koreya Yapon dənizinə doğru ballistik raket atıb.
Modern.az-ın məlumatına görə, bu barədə Cənubi Koreyanın "Yonhap" agentliyi ölkənin Birləşmiş Qərargah Rəisləri Komitəsinin məlumatlarına istinadən məlumat yayıb.
Bildirilir ki, bu, Şimali Koreyanın 2025-ci ildə ilk raket buraxılışı olub və qısa mənzilli ballistik raketin sınağından iki ay sonra həyata keçirilib.
Raket buraxılışı ABŞ dövlət katibi Entoni Blinkenin Seula səfəri ilə eyni vaxta təsadüf edib.
Yaponiya Sahil Mühafizəsinin ilkin məlumatlarına görə, raket dənizə düşüb. Tokio sularda olan gəmilərin ekipajlarına xəbərdarlıq edib ki, raket qalıqları aşkar edilərsə, dərhal səlahiyyətlilərlə əlaqə saxlamalı və onlara yaxınlaşmamalıdırlar. Hadisə ilə əlaqədar Yaponiya Baş Nazirinin Ofisində böhran qərargahı yaradılıb.
Cənubi Koreya ordusu Şimali Koreya tərəfindən buraxılan raketin təxminən 1100 km uçduğunu və Yapon dənizinə düşdüyünü bildirib.
