Qəzəblənən kənd təsərrüfatı həmkarlar ittifaqları Baş nazir Fransua Bayrou ilə görüşmək üçün yanvarın 13-nə qədər gözləmək niyyətində deyillər və qərarların mümkün qədər tez qəbul edilməsini istəyirlər.

 

Modern.az xəbər verir ki, etiraz nümayişi üçün Parisə daxil olmaq istəyən fermerlərin traktor karvanı paytaxtın girişində bloklanıb. Kənd Koordinasiyası (CR) rəhbər komitəsinin üzvü Sebastyen Ero (Sebastien Heraud) fermerləri Parisdə nümayiş etməyə, insanlara qəzəblərini eşitdirməyə çağırıb. S. Ero traktor karvanını bloklamak və fermerlərin etiraz nümayişlərini dayandırmaq üçün Daxili İşlər Nazirliyi tərəfindən vertolyotlar və zirehli jandarm maşınlarından, eləcə də polis resurslarından istifadə edilməsini pisləyib. Bildirib ki, nümayişçilər paytaxtın mərkəzindəki “Les Invalides” və ya “Le Trocadéro”ya çatmaq üçün bütün maneləri dəf edəcək. O, bir çox əyalətlərdən traktorların Parisə doğru hərəkətinə mane olmaq üçün milli avtomagistralların neytrallaşdırıldığını deyib. S.Ero qeyd edib ki, fermerlərin istədiyi tək şey siyasətçilərlə görüşmək və qərarların mümkün qədər tez qəbul edilməsidir. Kənd Konfederasiyası yeni Baş nazirin sələfləri kimi kənd təsərrüfatı məsələlərinə ikinci dərəcəli problem kimi baxdığını vurğulayıb.

 

Nümayişçilər fransız standartlarını Avropa standartlarına uyğunlaşdırmağı və nəzarəti dayandırmağı tələb edirlər.