Yanvarın 7-də ABŞ-nin Los-Anceles şəhərində meşə yanğını başlayıb. 100 mindən çox insan evlərini tərk etmək məcburiyyətində qalıb.
"Pasifik Palisades" adlı nüfuzlu yaşayış massivindəki yanğın sahəsi 65 kvadratkilometrə çatır.
Yanğın nəticəsində 5 nəfər həyatını itirib. Son məlumatlara görə, Los-Ancelesdə meşə yanğınları nəticəsində mindən çox bina yanıb.
Ərazidə yaşayan Hollivud aktyorları da evlərini tərk etməyə məcbur qalıblar. Qeyd edək ki, yanğınla əlaqədar Bayden İtaliyaya səfərini təxirə salıb və ərazidə fövqəladə vəziyyət elan edilib.
Qeyd edək ki, Los-Anceles şəhərində Azərbaycanın Baş Konsulluğu yerləşir. Konsulluğa Ramil Qurbanov rəhbərlik edir.
Modern.az konsulluğun hansı işlər gördüyü barədə məlumat əldə etmək üçün Xarici İşlər Nazirliyi ilə əlaqə saxlayıb.
Qurumdan bildirilib ki, Baş konsulluğun yerləşdiyi bina müvəqqəti olaraq evakuasiya edilib.
"Evakuasiyaya baxmayaraq, distant qaydada Baş Konsulluğun fəaliyyəti davam edir", - açıqlamada bildirilir.
Nazirlik qeyd edib ki, yanğınlarla əlaqədar, Azərbaycan vətəndaşlarının təhlükəsizliyinin təmin edilməsi məqsədilə Azərbaycanın Los Ancelesdəki Baş Konsulluğuna məxsus sosial media hesablarında xəbərdarlıq elanı və təcili əlaqə nömrəsi yerləşdirilib.
