Ermənistanın Avropa İttifaqına (Aİ) üzvlüyü Avrasiya İqtisadi İttifaqında (Aİİ) eyni vaxtda iştirakla bir araya sığmır.
Modern.az xəbər verir ki, bunu Rusiyanın xarici işlər naziri Sergey Lavrov İrəvanın Aİ üzvlüyünə can atmasına münasibət bildirərkən deyib.
Lavrov Aİİ-nin inkişafı ilə məşğul olan Rusiya Federasiyası Baş nazirinin müavini Aleksey Overçukun Aİİ və Aİ-nin uyğunsuzluğu barədə bəyanatını xatırladıb.
“Çünki bunlar iki fərqli azad ticarət zonası, rüsumların və tariflərin azaldılması və ya ləğv edilməsinin iki fərqli sistemidir, onlar üst-üstə düşmür”.
Lavrov digər məsləyə də münasibət bildirib:
“Ermənistan KTMT tədbirlərində iştirak etmir, amma ədalət naminə vurğulamaq istərdim ki, İrəvan qərarların qəbuluna mane olmur. Buna görə də təşkilat işləyir və fəaliyyət göstərir”.
Rusiyanın xarici işlər naziri əlavə edib ki, Ermənistanla Rusiya arasında münasibətlər sadə deyil.
O qeyd edib ki, hələ 2022-ci ilin payızında KTMT-nin müşahidə missiyasının istiqaməti sərhəddə (Ermənistan və Azərbaycan) çəkindirici rol oynamaq üçün razılaşdırılıb. Amma erməni həmkarları daha sonra bu qurumun sərhəddə sentyabr döyüşləri zamanı onları müdafiə etmədiyini bildirərək ondan imtina ediblər.
“Prezident Putin dəfələrlə bu mövzuya qayıdıb: delimitasiya olunmuş sərhəd olmayıb, xüsusən də heç vaxt demarkasiya olmayıb. Bəli, o zaman belə atışmalar olub, lakin KTMT missiyasından imtina etmək həm də Ermənistanın suveren qərarı idi”.
