ABŞ Prezidenti Donald Trampın andiçmə mərasimi zamanı çıxış edən milyarder İlon Maskın əl hərəkəti müzakirələrə səbəb olub.
Modern.az-ın məlumatına görə, Mask Vaşinqtondakı "Capital One Arena"da çıxışının sonunda qollarını qaldıraraq "Bəli" deyə qışqırıb.
"Bu, sıradan bir qələbə deyildi. Bu, bəşər sivilizasiyasının yolunda yolayırıcı idi. Bu, həqiqətən vacib idi. Bunu reallaşdırdığınız üçün təşəkkür edirik! Təşəkkür edirəm", - Mask deyib.
Daha sonra milyarder alt dodağını dişləyərək sağ əlini ürəyinin üstünə qoyub, ardınca əlini yuxarı doğru qaldırıb. Sosial mediada onun bu hərəkəti nasist salamı ilə müqayisə olunub
"Trampın andiçmə mərasimində Elon Mask Hitler salamı verdi?", - İsrailin məşhur "Jerusalem Post" qəzeti yazıb. Ancaq antisemitizmi izləyən qruplar bununla razılaşmayıb. Onlar bildirir ki, bu jest nasist salamı deyil, sevinci ifadə etmək üçün edilən hərəkətdir.
Mask hərəkətinin tənqidini "yorğun" hücum kimi qiymətləndirib.
"Açığını deyim ki, onların daha yaxşı çirkli fəndlərə ehtiyacı var. "Hər kəs Hitlerdir" hücumu çox yorğundur", - o, öz sosial media hesabında yazıb.
