ABŞ Senatı Marko Rubionun dövlət katibi vəzifəsinə namizədliyini təsdiqləyib.
Modern.az-ın məlumatına görə, bu barədə CNN məlumat yayıb.
99 senatorun hamısı Rubionun lehinə səs verib, əleyhinə səs olmayıb.
Bu, ABŞ prezidenti Donald Tramp administrasiyasında Senat tərəfindən təsdiq edilən ilk təyinatdır.
Mark Rubio senatorlara etimada görə təşəkkür edib və qeyd edib ki, o, həmkarları tərəfindən yekdilliklə belə bir vəzifəyə təsdiq olunmasını böyük şərəf hesab edir. Rubio bundan əvvəl Senatdakı vəzifəsindən istefa verəcəyini açıqlayıb.
Rubionun 53 yaşı var. Mayamidə Kubalı mühacir ailəsində anadan olub. Florida Universitetində siyasi elmlər üzrə bakalavr dərəcəsi və Hüquq Doktoru dərəcəsi alıb. 2010-cu ildə Floridadan senator olub və iki dəfə yenidən seçilib. O, 2015-ci ildə ABŞ-da keçiriləcək prezident seçkilərində iştirak etmək niyyətini açıqlasa da, sonda Donald Trampın namizədliyini dəstəkləyib. 2024-cü ildə vitse-prezidentliyə namizədlər arasında adı hallanırdı.
