Türkiyənin ana müxalifətdə olan Cümhuriyyət Xalq Partiyası (CHP) növbəti prezident seçkiləri üçün hazırlıqlara başlayıb.
Modern.az-ın məlumatına görə, partiyanın sədri ötən gün CHP-nin prezidentliyə namizədinin müəyyən edilməsi üçün yol xəritəsini açıqlayıb.
O, namizədin müəyyənləşdirilməsi üçün partiya daxilində səsvermənin keçiriləcəyini bildirib.
"İstanbulda bir sıra görüşlər keçirdik. Həmin görüşdə Əkrəm (İmamoğlu) başqanla və Mənsur (Yavaş) başqanla danışdıq və dəyərləndirdik. Artıq yeni bir başlanğıc, yeni bir dövr üçün birlikdə hazır olmaq mövzusunda razılıq əldə olunub", - Özəl deyib.
CHP sədri hər iki siyasətçinin namizəd olmağa hazır olduğunu deyib və onlara təşəkkür edib.
Özgür Özəl prezidentliyə namizədi partiya üzvlərinin müəyyənləşdirəcəyini vurğulayıb və bu prosesdə iştirak etmək istəyənləri partiya üzvü olmağa çağırıb. Partiya daxilində səsvermə fevral-mart aylarında baş tutacaq.
Qeyd edək ki, CHP nizamnaməsinə görə, prezidentliyə namizədi parlament fraksiyası müəyyənləşdirir. Anaq bu dəfə partiya daxilində səsvermə ilə seçiləcək.
Bəzi mətbuat orqanlarında İmamoğlunun prezidentliyə namizəd, Yavaşın vitse-prezident olacağı iddia edilir. Parlament seçkilərində isə 2023-cü ildəki prezident seçkilərindən sonra dağılan "Altılıq Masa" formatı yenidən müzakirə edilir.
