Türkiyənin ana müxalifətdə olan Cümhuriyyət Xalq Partiyası (CHP) növbəti prezident seçkiləri üçün hazırlıqlara başlayıb.
Partiyanın sədri bir neçə gün əvvəl CHP-nin prezidentliyə namizədinin müəyyən edilməsi üçün yol xəritəsini açıqlayıb.
O, namizədin müəyyənləşdirilməsi üçün partiya daxilində səsvermənin keçiriləcəyini bildirib.
"İstanbulda bir sıra görüşlər keçirdik. Həmin görüşdə Əkrəm (İmamoğlu) başqanla və Mansur (Yavaş) başqanla danışdıq və dəyərləndirdik. Artıq yeni bir başlanğıc, yeni bir dövrə birlikdə hazır olmaq mövzusunda razılıq əldə olunub", - Özəl deyib.
CHP sədri hər iki siyasətçinin namizəd olmağa hazır olduğunu deyib və onlara təşəkkür edib.
Özgür Özəl prezidentliyə namizədi partiya üzvlərinin müəyyənləşdirəcəyini vurğulayıb və bu prosesdə iştirak etmək istəyənləri partiya üzvü olmağa çağırıb. Partiya daxilində səsvermə fevral-mart aylarında baş tutacaq.
Qeyd edək ki, CHP nizamnaməsinə görə, prezidentliyə namizədi parlament fraksiyası müəyyənləşdirir. Anaq bu dəfə partiya daxilində səsvermə ilə seçiləcək.
Modern.az-ın məlumatına görə, Türkiyə mətbuatında CHP daxilində namizədin müəyyənləşdirilməsi ilə bağlı bəzi fikir ayrılıqları olduğu barədə xəbərlər yayılıb.
"BBC Türkcəyə" danışan Yavaşa yaxın mənbələr Özəlin Mansur Yavaşla keçirdiyi görüşdə namizədin səsvermə yolu ilə müəyyənləşdirilməsi qərarından bəhs etmədiyini bildirib.
Məlumata görə, Yavaş görüşdə namizədin indidən müəyyən edilməsinin doğru olmadığını bildirib.
Qeyd olunur ki, Yavaş namizədin erkən elan edilməsi və partiya üzvləri ilə keçirilən ilkin seçkilərin nöqsanları ilə bağlı etirazlarını partiya sədrinə göndərəcək.
Yavaş Özəllə görüşündə erkən seçki ehtimalının olmadığını, namizədin indi müəyyənləşdirilməsinin yanlış olacağını və bunun hakim partiyaya fayda verəcəyini deyib.
Bələdiyyə sədri ölkə gündəmində çox mühüm məsələlərin olduğu bir vaxtda partiyanın daxili müzakirələrə girməsinin yanlış olduğunu ifadə edib.
Yaxın ətrafının dediyinə görə, Yavaş partiya daxilində ilkin seçki keçirməyi düzgün görmür.
"Prezident təkcə CHP-lilərin səsi ilə deyil, həm də 60 milyon insanın səsi ilə seçiləcək. CHP-nin namizədinə səs verəcək baza genişləndirilməlidir", - mənbələr deyib.
O, cəmiyyətin geniş təbəqələrinin dəstəyini qazanmaq üçün Altılıq Masaya üzv olan siyasi partiyaların bazasının dəstəyinə də ehtiyac olduğunu bildirib: "Üzvlərin namizəd müəyyən etməsi Konstitusiyaya və qanuna ziddir... Namizədi siyasi partiya qrupları müəyyən etməlidir. Etibarlı ictimai rəy şirkətləri yalnız CHP üzvləri ilə namizəd müəyyən etmək əvəzinə çox geniş əsaslı ictimai rəy sorğuları apara bilər. Bu yolla bütün seqmentlərin seçimləri görünə bilər".
CHP-də “ilkin seçki” olacağı təqdirdə İstanbul Böyükşəhər Bələdiyyəsinin sədri Əkrəm İmamoğlunun prezidentliyə namizəd kimi çıxacağı az qala dəqiqləşib.
Keçmiş CHP sədri Kamal Kılıçdaroğluna yaxın şəxslər partiya üzvləri ilə ilkin seçki formulunu “Mənsur Yavaşı namizədlik yarışından kənarlaşdırmaq üçün atılan addım” kimi qiymətləndirirlər. Yavaşın ictimai rəy sorğularında lider namizəd olduğu, ancaq daxili seçkilərdə CHP əsilli İmamoğlu qarşısında şansının olmayacağı bildirilir.
