ABŞ Prezidenti Donald Trampın komandasında yer alan İlon Mask Beynəlxalq İnkişaf Agentliyinin (USAID) ləğvi prosesinin başladığını bildirib.
Modern.az-ın məlumatına görə, o bildirib ki, proses artıq başlayıb, təşkilatı bərpa etmək mümkün deyil.
"USAID qurdlu alma deyil, sadəcə qurd topasıdır. Alma yoxdur, ona görə də hər şeydən qurtulmaq lazımdır”, - Mask qeyd edib.
***
08:36
ABŞ-nin yeni prezidenti Donald Tramp bütün xarici yardımların dayandırılmasından sonra Beynəlxalq İnkişaf Agentliyinin (USAID) onlarla əməkdaşını inzibati məzuniyyətə göndərib.
Modern.az xəbər verir ki, bu barədə "Reuters" qərarla tanış olan üç mənbəyə istinadən məlumat yayıb.
Bildirilir ki, agentliyin Qanunvericilik və İctimaiyyətlə Əlaqələr Bürosunun 30-a yaxın əməkdaşının qəfildən elektron poçtlarına girişi qadağan edilib və bununla da son bir həftə ərzində məzuniyyətə göndərilən USAID əməkdaşlarının ümumi sayı 100-ə çatıb.
Mənbələrdən biri bildirib ki, agentliyin təhlükəsizlik əməliyyatlarına nəzarət edən iki yüksək vəzifəli məmur da məxfi sənədləri İlon Maskın rəhbərlik etdiyi Hökumətin Səmərəliliyi Departamentinin (DOGE) əməkdaşlarına verməkdən imtina etdikdən sonra inzibati məzuniyyətə göndərilib.
Məsələ ilə tanış olan beş mənbə Trampın aparat rəhbəri vəzifəsinə təyin edilən Mett Hopsonın da istefa verdiyini bildirib. Konqresdəki mənbə bildirib ki, onun istefası təhlükəsizlik işçilərinin işdən çıxarılmasından sonra baş verib.
Təmizləmə USAID-də bir həftədən çox davam edən xaosdan sonra baş verdi. USAID Vaşinqtonun bütün dünyada milyardlarla dollarlıq humanitar yardımı maliyyələşdirən əsas agentliyidir.
Prezident Donald Tramp ABŞ-ın demək olar ki, bütün xarici yardımlarının dondurulmasına göstəriş verib və onun administrasiyasının pulun “Öncə Amerika” xarici siyasətinə uyğun bölüşdürülməsini təmin etmək üçün xərcləri nəzərdən keçirəcəyini deyib.
İlon Mask isə ötən gün ABŞ Beynəlxalq İnkişaf Agentliyini (USAID) cinayətkar təşkilat adlandırıb. Ötən gündən etibarən təşkilatın saytına da girmək mümkün olmayıb.
Qeyd edək ki, USAID bir çox ölkənin daxili işlərinə qarışmaqda ittiham olunur.
